• Segue conectado
  • |

Olga Novo, Cráter (Toxosoutos, 2011)

O 21 de abril déronse a coñecer desde Segovia os autores e os títulos de 2011 que gañaron o Premio da Crítica Española. A particularidade deste premio consiste en que o conceden críticos de renome e que recae en obras, líricas e narrativas, pertencentes ás catro linguas oficiais. Os galardonados galegos son Antón Riveiro Coello con Laura no deserto (Galaxia, 2011), novela que tamén merecería un comentario neste espazo, e Olga Novo con Cráter, no apartado da poesía.

A Cráter pódenselle aplicar moitos dos adxectivos que se lle viñeron apoñendo aos seus poemarios anteriores: telúrico, sensual, feminista, libertario, panteísta… Aínda que os termos tiveron a connotación das etiquetas, sobre todo nos anos 90 cando as novas voces femininas revolucionaron a poesía galega do momento, conseguiron trascender as fronteiras do inmediato para asentar unha linguaxe propia e absolutamente recoñecible. O novo título pon un miliario máis no camiño marcado xa por A teta e o sol, Nós nus e A cousa vermella. Tamén aquí se deixa oír unha voz firme, un eu poético afirmativo e plenamente consciente da terra e do xénero ao que pertence. Unha presenza poderosa que asenta a súa forza nunha identidade con raizames no pasado, e as mulleres que a precederon teñen moita culpa, e con proxecto de futuro. A solidez, manifestada tamén a través de versos que son enunciacións rotundas que o ollo recolle, non é incompatible coa vulnerabilidade. Tampouco coa experiencia gozosa do que ofrece a natureza. A integración do contraste, paralela á simbiose entre corpo e paisaxe, percíbese tanto en escenario galego como en escenario alleo, do que o mellor exemplo é a realidade italiana, e dentro dela, a vesuviana. Para os dous contextos serven, á fin, as revelacións proféticas da deusa campesina, Ceres ou bisavoa galega, que se intercalan a cada pouco. Polos dous contextos é que o libro arrecende a caldo, auga e verde, pero tamén a carne, sol e vermello.


Licenciada en Filoloxí­a Hispánica, (UDC, 1994-1998) e Filoloxí­a Galega (USC, 1998-2000), na actualidade, imparte aulas de Lingua e Literatura Galega no Ensino Secundario.
Publicado o 12 Mai 2012 en Libros.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies