• Segue conectado
  • |

“O AVE non chegará a ningunha cidade galega ata 2022”

Santiago de Compostela | A crónica dunha rendición anunciada. Así definiu Luís Villares a actitude de Feijóo con respecto ó Goberno central á hora de negociar os prazos da chegada do AVE a Galicia. “A Alta Velocidade non chegará a ningunha cidade galega antes de 2022 porque vostede foi a Madrid a comportarse como un subordinado, como un simple delegado do Goberno en Galicia, foi vostede co rabo entre as pernas e volveu cunha mentira nos beizos”, díxolle o portavoz de En Marea ó Presidente da Xunta durante a sesión plenaria.

 

“E por que habiamos de confiar na súa palabra. Primeiro dixeron 2010, despois 2012, logo 2015, logo 2018. Tiveron que inventar o troceado igual que inventaban as mordidas da adxudicación de obra pública para pagar con sobres a altos cargos do PP e as reformas de sedes do PP agora trocean os tramos para poder xustificar a chegada no AVE no ano 2019. Quen confia no Feijóo da AP9 para Galicia, do Vega Sicilia, quen se fia do Goberno amigo de Bárcenas e do amigo dos hilillos de plastilina. Por canto tempo máis temos que aguantar o galego ser tratados como cidadáns de segunda?”, argumentou o portavoz do grupo parlamentario de En Marea.

Luís Villares referiuse na súa intervención ó treito Taboadela-Ourense, que aínda está por licitar e aproveitou para pedirlle ó Presidente da Xunta que impida a segregación e venda das centrais de Ferroatlántica. “Claro que vostede non o saberá, como tampouco sabía hai unhas semanas que Villar Mir tiña intención de esnaquizar Ferroatlántica e vendela separadamente. Sóuboo porque entrou no Parlamento pola boca de En Marea, que trouxo a voz de toda a comarca da Costa da Morte en defensa dos seus postos de traballo. Defenda a legalidade da concesión e non permita a venda frarccionada da hidroeléctrica e da ferroaleación”, instou Villares.

Despois de preguntarlle a Feijóo polos prazos, Luís Villares reivindicou un servizo ferroviario de proximidade que vertebre Galicia “porque a nós gústanos ir a Madrid pero tamén nos gustaría poder ir de Santiago a Lugo en tren”.

O presidente da Xunta non respondeu a pregunta de En Marea e limitouse a dicir que En Marea non ten lexitimidade para preguntar polo AVE pois el vive na “calle Vista Alegre e levan dous anos sen rematar as obras”, en referencia á residencia oficial de Monte Pío en Santiago de Compostela.

Publicado o 16 Feb 2017 en Santiago de Compostela.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies