• Segue conectado
  • |

Gabriel Tizón inaugura en Bissau a exposición fotográfica ‘Europa, realidade dun soño’

A Peneira dixital - causas comunsPontevedra |  A exposición fotográfica ‘Europa, realidade dun soño’ do fotógrafo galego Gabriel Tizón inaugurouse onte 8 de xaneiro en Bafatá (Guinea Bissau) coa participación de máis de 300 persoas. Esta inauguración é a primeira parada do proxecto Causas Comúns, que apoian o Fondo Galego de Cooperación e Solidariedade e o Concello de Pontevedra.

Causas Comúns nace cun obxectivo claro: informar e sensibilizar a través da fotografía como idioma común, tanto ao pobo galego como ao de Guinea Bissau, do cada vez máis evidente incumprimento dos Dereitos Humanos tanto en África como en Europa. A vivenda, o traballo, a comida, a xustiza… Son xa artigos de luxo, non só nos “países pobres” ou empobrecidos.

Despois de experiencias anteriores en Guinea Bissau e noutros países africanos por parte do autor desta mostra, con exercicios similares a esta exposición, son moitas e moitos quen recoñecen non ser conscientes desta realidade, dunha Europa chea de dificultades económicas e sociais, o que nalgúns casos lles fixo reflexionar e reconsiderar a súa decisión de emigrar. Coa exposición ‘Europa, realidade dun soño’ preténdese resaltar a importancia de dar a coñecer esta situación entre o pobo africano, para visibilizar ao que se enfrontan e os obstáculos que se van atopar no camiño a Europa.

Gabriel Tizón e a traballadora social Rocío Botana permanecerán en Bissau até o día 17 de xaneiro realizando distintos obradoiros con fotógrafos locais e líderes de diferentes comunidades, ao tempo que presentan a exposición en diversas vilas do país.

A inmigración no século XXI é, segundo as persoas expertas, un dos principais problemas ao que se vai enfrontar a humanidade. Unha situación que non é nova nin descoñecida para o pobo galego, en particular, e en xeral para o resto da sociedade española, consciente dos custos históricos e sociais da emigración e día a día das graves violacións de Dereitos Humanos que acontecen nas nosas fronteiras.

O proxecto Causas Comúns aterrará a finais de febreiro en Pontevedra da man da exposición ‘África, soños e mentiras’, para tecer unha ponte de solidariedade coas persoas que deciden migrar ao noso país. A mostra presentarase na cidade do Lérez e circulará por distintos centros sociais e de ensino ata o mes de xuño. Posteriormente, a exposición converterase en itinerante entre as administracións socias do Fondo Galego.

Este proxecto está apoiado integramente polo Fondo Galego de Cooperación e o Concello de Pontevedra, en estreita colaboración coa ONG local EACS-D.

O Fondo Galego

O Fondo Galego de Cooperación e Solidariedade está integrado por 87 Concellos e as Deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido uns 150 proxectos en 25 países e promove numerosas actividades e materiais en relación aos desequilibrios Norte-Sur.

Publicado o 9 Xan 2015 en Pontevedra.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies