• Segue conectado
  • |

Curso federativo de monitor de fútbol base en Ponteareas

A Federación Galega de Fútbol, a través da Escola Nacional de Adestradores e en colaboración coa Concellería de Deportes do Concello de Ponteareas, convocan o Curso federativo de monitor de fútbol base, que se celebrará en maio e xuño

monitor

Ponteareas | O alcalde, Xosé Represas, e mailo concelleiro de Deportes, Benito Márquez, recibiron no día de onte na casa consistorial a visita do presidente da Escola Nacional de Adestradores, Manuel Mosquera, e do Coordinador dos cursos de monitor de fútbol base no Baixo Miño, José Luis Mosquera, presentando no Salón de Plenos o curso aos diversos clubes da zona.

Un total de 35 persoas poderán participar nesta convocatoria, asignándose a praza por orde de inscrición.

O obxecto da convocatoria deste curso é completar a formación de Monitor de Fútbol Base, mediante as ensinanzas conducentes á obtención do Diploma Federativo. Este curso ten por finalidade proporcionar aos alumnos a formación que garanta adquirir os coñecementos e habilidades necesarias que permitan desenvolver a súa labor, mediante competencia técnica e profesional nas competicións organizadas pola Federación Galega, con profesionais que actuaron no ámbito do fútbol, utilizando os medios materiais e humanos que dispón a Federación Galega de Fútbol.

“Estamos encantados de colaborar coa Federación Galega de Fútbol e coa Escola Nacional de Adestradores, e de que este curso teña lugar no noso concello, xa que se trata dun curso moi demandado. O feito de que se celebre en Ponteareas pon en valor a tradición futbolística da nosa vila, onde hai moitos clubes que fomentan o deporte desde as categorías base”, sinalou Benito Márquez, concelleiro de Deporte de Ponteareas.

O curso conduce á obtención do diploma federativo de “Monitor de Fútbol base”, especialidade “fútbol”, e está avalado pola Escola Nacional de Adestradores da RFEF, que á súa vez permite a convalidación do Bloque de Prácticas a realizar cando efectúen o Curso Federativo Adestrador Básico de Fútbol.

As persoas interesadas deberán inscribirse de maneira online na web www.futgal.es na parte de Adestradores/Escola/Inscrición e entregar a documentación orixinal o primeiro día das clases, que se compón de:

a.- Fotocopia do DNI (anverso e reverso)
b.- Fotocopia do Título de Graduado en Educación Secundaria (ou titulación superior) ou equivalente a efectos académicos (válido Graduado Escolar)
c.- 2 fotografías tamaño carné (co nome por detrás)
d.- Documentación adxunta cuberta (matrícula)
e.- Xustificante de pago de 150 €.

O período de inscrición abriu o 02 de maio e estará aberto ata o primeiro día do inicio do curso. Ofértanse un máximo de 35 prazas, cubríndose por orde de inscrición. O prezo do curso é de 150 euros. Os requisitos son ter os 16 anos cumpridos e estar en posesión do Título de Graduado en Educación Secundaria ou título equivalente segundo o plan de estudios do aspirante. O curso celebrarase entre o 30 de maio ata o 30 de xuño, en horario de 19.30 a 22.30, nas instalacións deportivas de Pardellas e no Centro de Desenvolvemento Local. Para poder obter o certificado de monitor de fútbol base, requirirase a avaliación positiva das distintas áreas e materias de que consta o curso, entre as que se atopan: filosofía didáctica do fútbol, psicoloxía, ética deportiva, ou fisioloxía, nutrición e medicina do fútbol, entre outras, e a asistencia ao 75 % das sesións presenciais por materia.

Publicado o 8 Mai 2017 en Ponteareas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies