• Segue conectado
  • |

“A Rúa é Vosa” encherá Monforte de actividades ó aire libre

a rua e vosa
MONFORTE DE LEMOS | A Concelleira de Cultura, Marina Doutón, e o coordinador do terceiro festival cómico festivo “A Rúa é Vosa”, Aitor Rei, presentaron esta mañá na Casa do Concello o cartel e o programa de actividades, que se desenvolverá entre o 12 e o 16 de agosto.

“O festival cómico festivo ofrece desde mañá 14 funcións para tódolos públicos”

Marina Doutón expresou a súa ledicia porque “as rúas estean cheas de vida estes cinco días con este programa de actividades” e destacou a variedade da oferta de espectáculos, que inclúe un festival pensado para tódolos públicos.

Pola súa parte, Aitor Rei explicou que a terceira edición deste festival que nos anos anteriores conseguiu un grande éxito en Monforte, mestura distintos tipos de espectáculos: o circo, a acrobacia, os monicreques, a danza e todo co nexo común do humor. “A Rúa é Vosa sempre se caracterizou por levar ó público algo divertido, tanto a quen circula pola rúa buscando a función como a quen se atopa con ela de sorpresa. Pretendemos que sexa divertido porque cremos que as festas son para que a xente o pase ben e se evada da vida cotiá”. Recalcou tamén a idoneidade das producións deste ano, aptas para público infantil e adultos.

Sete funcións en sesión dobre de mañá e tarde
“A Rúa é vosa” abre a terceira edición este mércores ás 12:30 horas na Praza de España coa compañía “Kanbahiota” que representará o espectáculo Vaia Circo con tres personaxes circenses. Pola tarde, ás 20:30 horas, no mesmo escenario poñen en escena elementos novidosos e espectaculares como os portes coreanos, os mastros chineses, clown… nunha proposta de acrobacias aéreas e risas.

O xoves 13 haberá dúas propostas: a compañía Circo Cair cun espectáculo circense protagonizado por catro personaxes que realizan coreografías acrobáticas, excéntricas, con golpes e caídas caóticas que contrastan con coreografías máis visuais de danza e malabares, nas que o absurdo, o sinxelo e o universal están presentes nas rutinas do circo. As funcións son ás 12:00 na rúa do Cardeal e ás 20:30 na Praza de España. En segundo lugar, ás 13:00 horas do mediodía e ás 19:30 horas da tarde, Títeres Alakrán ofrece a súa función de monicreques de cachaporra tradicional na que recuperan o personaxe galego máis popular do teatro de monicreques dos anos cincuenta: Barriga Verde. As dúas función serán na rúa do Cardeal.

Títeres Mercromina chega a Monforte o venres día 14 de agosto con “Vacacións no mar”, un espectáculo de monicreques de luva adaptados ó público actual. Haberá sesión dobre ás 12:00 da mañá e ás 19:30 horas do serán. A outra representación do venres vén da man Do clown Nono que ofrecerá un espectáculo tenro con moito humor no que combina o mimo, os malabares e o clown, todo aderezado cun chisco de loucura. Ás 13 horas no Cardeal e ás 20:30 na praza de España.

“A Rúa é vosa” bota o peche en Monforte o domingo 16 de agosto coa compañía Circo Chosco que representa, na rúa do Cardeal ás 12:00 e na praza de España ás 19:30 horas, un número sen fala no que mestura comedia e circo con acrobacias, malabares, técnicas de portes e equilibrios. A última proposta é a da compañía Malabreikers que cos personaxes de Tornillo e Beto, un dos mellores acróbatas de Europa, ofrecen unha representación fresca e descarada con acrobacias e malabares incribles. Ás 13:00 horas no Cardeal e ás 20:30 horas na praza de España.

O programa do festival inclúe sete espectáculos que se ofrecen en 14 representacións, con sesións de mañá e tarde e que contan cun orzamento de 16.992 euros, subvencionados pola Deputación de Lugo.

Publicado o 11 Ago 2015 en Axenda, Monforte de Lemos, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies