Salceda de Caselas | A Praza de Abastos de Salceda reabriu este 1º de abril logo de máis dun mes sen servizo de venda de peixe fresco polas obras que se están a levar a cabo no edificio. O Concello acadou unha subvención de 196.589,04 € da Xunta para sufragar o 80% das obras nesta III fase de reforma, aportando o propio Concello o 20% restante de fondos propios (49.147,26 €).
O edificio vai presentar unha nova imaxe logo de que se cambiase o pavimento existente, de terrazo ata o de agora, e que pasa a ser un chan de morteiro armado con fibras de polipropileno. A outra parte da reforma consistiu na mellora da accesibilidade coa instalación dun ascensor montacargas que conecta directamente a zona de venda de produtos coa zona de aparcadoiro existente na parte posterior do edificio. Habilitarase tamén unha zona de recollida de pedidos para uso da clientela.