Enrique González Pedreira, “Quiño” asumiu no verán de 2024 a presidencia da Sociedade Deportiva Juvenil de Ponteareas. O club, que transita por unha complicada situación económica e de demandas xudiciais, está actualmente no Grupo 2 da División Preferente de Fútbol Galego.
Despois dun ano como Presidente do club Juvenil de Ponteareas, que balance de xestión pode facer?
Tendo en conta a situación na que collimos o club fai un ano, cando este estaba abocado á desaparición debido a unha situación económica crítica; penso que a xestión está sendo boa a nivel xeral. Estamos no camiño correcto para limpar as supostas débedas que arrastraba o Juvenil cando esta nova Xunta Directiva asumiu o seu mandato. A pesar de ser moi complicado, pouco a pouco e con moito esforzo imos afrontando as consecuencias de asumir a dirección dun club que non tiña futuro.
A nivel deportivo, penso que o ano pasado fíxose unha tempada notable a pesar de que nos descendesen, xa que as condicións para formar a plantilla foron totalmente adversas. Partimos dun plantel, a día 15 de xullo de 2024, sen xogadores nin corpo técnico. Ningún xogador do pobo nin de arredores quería sentarse a falar con nós, a xente falaba “pestes” do club e finalmente moitas das fichaxes foron a última hora, recorrendo a moito xogador de fóra que non coñecía a categoría e dándose así un continuo vaivén de caras no plantel. Toda a mala fama dunha xestión nefasta a fumos pagando durante a tempada, á vez que pouco a pouco íamos lavando a imaxe do Juvenil.
Como está a reclamación xudicial ante Competición e Disciplina?
Actualmente a reclamación atópase no Comité Galego de Xustiza Deportiva tras ser admitida a trámite, polo que estamos a esperas da resolución por parte de dita Institución.
Que expectativas ten o Juvenil de cara a presente tempada 2025/2026?
As expectativas son as mesmas que cando collemos o club fai un ano.
– Recuperar a masa social que sempre tivo o Juvenil e que acabou moi mermada con tan só 12 socios na tempada 2023-2024;
– Sanear o club no que ao ámbito económico se refire;
– Dar unha saída futbolística de bó nivel aos nenos da comarca que queiran seguir xogando ao fútbol;
– Ter dous equipos de maiores cunha gran porcentaxe de xente do pobo.
Cal é o estado financiero do club? Están resoltos os problemas coa anterior Directiva?
O estado financiero do club é crítico, como leva sendo moitos anos. Unha gran cantidade de demandas por parte de xogadores, entrenadores, técnicos e empresas e mesmo un préstamo aínda por rematar de pagar herdado da anterior directiva. Aínda así, grazas a pequenas e grandes empresas do pobo seguimos tentando sobrevivir, ás cales aproveitamos para darlles as.
“O estado financiero do club é crítico, como leva sendo moitos anos”
Facendo referencia á anterior directiva, debido á desatención de reiterados requerimientos que se lle fixeron para obter información relevante para o club en materia económica e financiera, o Juvenil está inmerso en numerosos procesos xudiciais.
Existe apoio das institucions públicas: Concello, Deputación e Xunta?
Por parte da Deputación e da Xunta estamos a recibir o mesmo apoio que estas ofrecen ao resto de clubs: subvencións e axudas xerais. Por parte do Concello o apoio está sendo maior, e a base de reunións e solicitudes pouco a pouco estamos a conseguir tamén melloras no campo, nunha instalación que queremos recordar é municipal e que se atopaba con numerosas deficiencias que estamos procurando mellorar.
“Por parte do Concello o apoio está sendo maior”
Que mensaxe querer transmitir aos socios e aficionados?
A mensaxe é clara. A día de hoxe non podemos garantizar a existencia do club durante as próximas tempadas debido a unha situación económica crítica derivada de varias decisións tomadas pola directiva anterior e sinaladamente polo seu presidente. A pesar disto, a actual Directiva traballa sen descanso nin outro beneficio máis que o común polo Juvenil para conseguir reverter a situación e salvar ao club da desaparición.
