Ponteareas | O Concello de Ponteareas abrirá os portais alfombristas este venres día 30 ás 20:30 horas e con este acto activa a conta atrás para a celebración das festas do Corpus Christi. O grupo de goberno visitará un a un os vinte portais alfombristas que preservan a tradición de Corpus e prolongan a sabedoría popular de conservación de flores e elementos vexetais.
As mans das e dos alfombristas traballan xa no desfolle e preparación dos materiais naturais das alfombras de flores con técnicas e coñecementos que son transmitidos de xeración en xeración. Precisamente este é un dos motivos polo que o Corpus Christi de Ponteareas foi declarado o ano pasado Ben de Interese Cultural inmaterial.
Nos portais alfombristas as veciñas e veciños organízanse para traballar cada tarde. Uns recolleitan, outros desfollan, outros fan o deseño e todos xuntos confeccionan o tapiz de flores na noite do Corpus que terá lugar do sábado día 21 ao domingo día 22.
Ademais da visita oficial aos portais alfombristas, o goberno tamén visitará a exposición fotográfica “Traballos previos ás alfombras de Corpus”, unha singular proposta distribuída polos comercios de Ponteareas do percorrido alfombrista. A alcaldesa, Nava Castro, e o tenente de alcaldesa, Juan Carlos Glez. Carrera, salientan a importancia dos portais alfombristas que son os auténticos portadores da tradición e un auténtico espectáculo para os sentidos.
Programa cultural
Na axenda de actos oficiais tamén está a presentación do Corpus Christi na Casa de Galicia en Madrid o mércores día 4 de xuño. Entre as novidades do programa desta edición está a conferencia “Pasado ancestral das alfombras florais. Conciencia e compromiso, de Galicia á Unesco” da arqueóloga Ana Filgueira o sábado día 7 ás 10:30 horas en Artistea.
A presentación da revista Pregón chega acompañada de música de corda do Conservatorio Municipal de Música e será o venres 13 ás 20:30 horas. Para o desfrute de todas as persoas asistentes ao remate da presentación da revista inaugurarase o videomapping do Corpus ás 22:30 horas.
Ao día seguinte, sábado día 14 espectáculo de luces e danza e concerto de Xosé Manuel Budiño na praza Bugallal ás 22:00 horas e o domingo 15 ás 12:00 inauguración da exposición “Corpus en Flor” no auditorio municipal. A lectura do pregón será ás 12:30 horas a cargo do ciclista e alfombrista ponteareán Borja Gómez Méndez. O venres día 20 inauguración da decoración colgante “Corpus inclusivo” na praza Maior.
As delegacións alfombristas chegarán dende Melgaço, Monçao, Viana do Castelo, Caminha e Arcos de Valdevez. O embaixador de Malta en España e unha representación da Worshipful Company of Gardeners de Reino Unido estarán entre os convidados que coñecerán a tradición do Corpus Christi de Ponteareas. O sábado día 21 ás 18:00 horas comezarán a confeccionarse as tradicionais alfombras de flores de Corpus e ás 20:00 horas terá lugar a recepción de autoridades e percorrido polos portais alfombristas.
O domingo 22, día de Corpus Christi, os actos comezan ás 10:30 horas sendo a misa ás 11:30 horas cantada pola Coral do Centro Artístico Sportivo seguida da procesión de Corpus Christi que este ano estará acompañada pola Banda de Cornetas e Tambores da Coronación de Espinas de Córdoba. Ás 19:00 horas será o desfile de carrozas con animación musical, ás 22:00 horas as actuacións das orquestras é ás 00:00 horas o lanzamento de fogos artificiais.
O luns 23, festivo local, será o día das nenas e dos nenos con inchables gratuítos na praza do Concello e actividades infantís. A santa misa por todos os alfombristas será ás 18:00 horas e a ofrenda floral in memorian ás 20:00 horas. Ás 20:30 acto de entrega de medallas de Corpus Christi coa actuación da banda de gaitas “Os Zoqueiros” A partir das 22:00 horas as orquestras volven ás prazas Bugallal e Maior.
A entrega de premios do II Concurso Balcóns Floridos o martes 24 ás 12:00 horas no salón de plenos.
Alcaldesa e tenente de alcaldesa convidan a toda a cidadanía a participar nos distintos actos deseñados arredor destas festas declaradas Festa de Interese Turístico Internacional e Ben de Interese Cultural inmaterial.
Ao longo deste mes haberá tamén probas deportivas como o 5º aniversario do club LEAM o domingo 15, o II Tritea campionato de triatlón alego o sábado 21 e do 28 de xuño ao 5 de xullo torneo de tenis Vila do Corpus.
Tamén se porá en valor o folclore galego con actuacións das cantareiras, pandereteiras e grupos folclóricos das casas e centros cutlurais con concertos o mércores 11, o venres 13, o luns 16, o martes 17, o mércores 18 e o venres 20.