Vigo | Inaugurado en 1948 grazas ao emprendedor de cine Isaac Fraga Penedo, quen encargou seis anos antes a súa construción ao arquitecto Luis Gutiérrez Soto, o Teatro Cine Fraga comeza a visualizar o seu retorno para 2028 tras 24 anos pechado, toda vez a Deputación de Pontevedra e a Xunta de Galicia compraron en 2024 este histórico emblema vigués á ABANCA.
Así, a Deputación e a Xunta están organizando, en principio ata mediados de 2026, unha serie de visitas guiadas ao Teatro Cine Fraga os días mércores e sábados ante o aumento da demanda por parte da cidadanía para coñecer os proxectos que se están a levar a cabo, orientados a súa reapertura prevista para 2028.
A través dun investimento de 20 millóns de euros e cunha licitación en marcha, a Deputación e a Xunta pretenden devolver ao Fraga o seu esplendor de antano, confirmado polo paso de grandes artistas como Kiri Te Kanawa, Ute Lemper, Julio Iglesias, Elton Johh, María Bayo, Ewa Poddles, Teresa Berganza, Montserrat Caballé, Georgie Dann, Massiel e Loquillo, entre outros. A súa importancia é de tal calibre que a propia cantante lírica Montserrat Caballé chegou a comparar a acústica do Fraga coa do prestixioso Teatro La Scala de Milán.
Entre as iniciativas en curso están a apertura dun museo dedicado ao seu creador Isaac Fraga Penedo; a ampliación da capacidade das butacas ata 2.000 persoas; un centro de interpretación; a posibilidade de abrir salas de fiesta; cafetería e aulas de creación literaria, exposicións e de lectura. O obxectivo é recuperar o peso deste patrimonio vigués como centro cultural para o teatro e a música e outras actividades artísticas de vangarda dentro da zona de Galicia e o Norte de Portugal. Debe igualmente destacarse que desde 2005, o arquitecto César Portela comezou o proxecto de restauración deste Cine Teatro.
