Mos | O Concello de Mos celebrou hoxe en Costoias (Tameiga) a XXXV edición da Gran Festa dos Maiores, unha xornada multitudinaria de convivencia e emoción que reuniu a arredor de 700 persoas.
O día comezou coa misa cantada pola Coral O Son dos Cantares e a actuación da Banda de Música de Torroso, para dar paso ao tradicional xantar popular no que se serviron racións de callos doadas por Coren e no que tamén colaborou a Asociación Cultural San Martín de Tameiga.
O momento máis especial da tarde chegou coa homenaxe ás 50 parellas do municipio que celebran este ano as súas vodas de ouro. Durante o acto estiveron presentes 18 das parellas homenaxeadas, recibindo un detalle conmemorativo da man da alcaldesa, Nidia Arévalo, e da corporación municipal.
Os matrimonios homenaxeados foron: dous de Guizán, tres de Petelos, cinco de Torroso, nove de Mos, tres de Dornelas, sete de Pereiras, oito de Tameiga, catro de Sanguiñeda, catro de Louredo e cinco de Cela.
Tras a emotiva homenaxe, a festa continuou cunha tarde de música, baile e animación, enchendo de vida, recordos e alegría a parroquia de Tameiga.
A alcaldesa, Nidia Arévalo, subliñou que “hoxe Mos celebrou o triunfo do amor e da vida compartida, rendendo unha merecida homenaxe ás persoas maiores que representan os piares da nosa sociedade, a memoria viva do noso municipio e o exemplo para as xeracións máis novas”.
A Gran Festa dos Maiores, organizada polas concellerías de Política Social e Participación Cidadá, consolídase así como unha das citas máis queridas e emotivas do calendario mosense, mantendo viva unha tradición que desde 1990 reúne á veciñanza arredor das persoas maiores.