Muíños | Plácido Álvarez, alcalde do concello ourensán de Muíños, visitou a Xosé Merelles Remy, director de Turismo de Galicia, en Santiago de Compostela.
Na xuntanza falaron de asuntos de interese para afondar nalgúns atractivos turísticos do Concello especialmente vinculados coa natureza, o turismo deportivo e gastronómico.
Púxose de manifesto a relevancia que están a ter festividades populares como as Festas do Galo Pica no Chan, a Festa do Becerro do Xurés e a Festa das Sopas do Burro Canso, así como a outras propostas consolidadas como o Festival Muiños Dance, que celebrará este ano a súa 16ª edición.
Tamén se afondou na oferta turística do concello, así como en recursos como o centro BTT ou o complexo turístico deportivo de O Corgo. Recursos que, como indicou Xosé Merelles, están a contribuír a ofrecer un destino turístico cada vez máis diversificado e distribuído polo territorio.