Vigo | Coa iniciativa de Ponte…nas ondas! e a colaboración da Deputación de Pontevedra dez centros educativos da provincia de Pontevedra acolleron sesións prácticas de traballo coa radio e co patrimonio inmaterial. Os obradoiros desenvolvéronse nos seguintes centros: IES Sanchez Cantón de Pontevedra, CEIP do Foxo e IES A. Losada Dieguez de A Estrada, IES de Ponte Caldelas, CEIP Carlos Casares de Salvaterra de Miño, IES Indalecio Prieto de Tui, IES Pedras Rubias de Salceda de Caselas, CEIP Petelos de Mos, IES de Valadares e IES Alexandre Bóveda de Vigo.
Conchi Díaz (profesora do IES Sánchez Cantón): “unha marabillosa actividade para transmitir ao alumnado a paixón polo patrimonio inmaterial e a creatividade da radio en directo”. Fernando Telle (profesor do IES Pedras Rubias): “atractiva experiencia para o noso alumnado onde a música e radio camiñaron da man durante dúas horas e que se concretou na gravación dun podcast onde o alumnado puido sentir a tensión da radio executada en directo”.
O actor de voz e formador en comunicación Damián Alonso e o recoñecido músico de cordas Pancho Álvarez desenvolveron un ciclo de 10 obradoiros creativos en centros de educación primaria e secundaria da provincia de Pontevedra, dentro do programa “Falamos nas Ondas” que promove o coñecemento e a transmisión do patrimonio cultural inmaterial galego-portugués.
Cada obradoiro, dirixido a grupos de arredor de 30 alumnos e alumnas, combinou dúas experiencias complementarias: a música tradicional de corda e a comunicación radiofónica.
A música como canle de identidade
Baixo a guía de Pancho Álvarez, o alumnado tivo a oportunidade de coñecer de preto instrumentos de corda como o violín, a viola, a arpa, a zanfoña ou a guitarra, descubrindo a súa historia, os seus sons e a súa presenza na tradición galega.
Durante a sesión, preparáronse interpretacións de pezas representativas do patrimonio musical como as regueifas, poñendo en valor o repertorio popular e a participación colectiva.
A radio como espazo de creación
En paralelo, con Damián Alonso, o grupo mergullouse no mundo da radio e o podcast educativo: aprenderon a crear guións, interpretar textos e manexar unha mesa de son, coñecendo de primeira man o proceso de produción dun programa.
O resultado final foi a gravación en directo dun podcast duns 25 minutos, con música ao vivo e contidos elaborados polo propio alumnado, nos que abordaron temas como xogos populares, oficios tradicionais, viaxes, adiviñas, refráns, ditos, humor, saberes e festas. Unha experiencia participativa e lúdica que fomentou a expresión oral, o traballo en equipo e a creatividade.
Un exemplo do “modelo Ponte…nas ondas! de boas prácticas co patrimonio cultural inmaterial (PCI)”
Estes obradoiros enmárcanse nas accións que promove a asociación Ponte…nas ondas! e que a UNESCO inscribiu no Rexistro das boas prácticas co Patrimonio Cultural Inmaterial (PCI). O “modelo” consiste na integración no ámbito educativo do PCI, a radio escolar e as tecnoloxías da información e da comunicación (TICs).
A transmisión do PCI e as retransmisións radiofónica a través das novas ondas son unha mostra do potencial do modelo PNO! como ferramenta para valorizar o patrimonio cultural e dar voz ás novas xeracións.