Deputación de Pontevedra achega máis de 40.000€ para proxectos en Honduras, Bolivia e O Salvador

Centrados no empoderamento das mulleres
A presidenta da Deputación, Carmela Silva, anuncio a aprobación da concesión da nova liña de subvencións por valor de 40.118,36 euros a proxectos liderados por ONGD para a cooperación ao desenvolvemento.

Pontevedra | A Deputación de Pontevedra vén de aprobar a concesión da nova liña de subvencións por valor de 40.118,36 euros a proxectos liderados por ONGD para a cooperación ao desenvolvemento. En concreto, mediante estas subvencións a asociación “Amigos da Terra”, a “Fundación Taller de Solidaridad” e “Solidariedade Internacional de Galicia” impulsarán iniciativas centradas no empoderamento das mulleres en Honduras, Bolivia e El Salvador.

As subvencións enmárcanse nesta primeira convocatoria, realizada ao longo deste ano 2021, e destinadas a ONGD que lideran proxectos de cooperación aliñados coa Axenda 2030 en países empobrecidos. Deste xeito, os recursos da institución provincial permitirán financiar o 100% da contía que solicitaron as tres organizacións non gubernamentais.

No caso de “Amigos da Terra” as axudas, que ascenden a 15.000 €, permitirán impulsar o proxecto “Mellora do exercicio dos dereitos das mulleres rurais cunha vida saudable e libre de violencias e co empoderamento económico en comunidades de El Corpus (Honduras)”.

Pola súa banda a “Fundación Taller de Solidaridad” recibirá 10.118,36 € para promover unha iniciativa de “Fortalecemento do empoderamento de mulleres indíxenas migrantes na súa vida familiar e social, desde o enfoque de xénero no desenvolvemento, en tres barrios de Ushpa Ushpa en Cochabamba (Bolivia)”.

Finalmente, “Solidariedade Internacional de Galicia” beneficiarase dunha subvención de 15.000 € para o lanzar o proxecto “Impulsando medios de vida resilientes para as mulleres en El Salvador”.

Novo contrato SICTED
Por outra banda, a Deputación de Pontevedra vén de aprobar en Xunta de Goberno a adxudicación dun novo contrato de servizos para a implantación e desenvolvemento do Sistema Integral de Calidade Turística Española en Destinos (SICTED) no destino Rías Baixas Pontevedra Provincia.

Este novo contrato, que conta cun orzamento de 237.160 euros e unha duración de 27 meses, permitirá á institución provincial seguir avanzando na implantación, consolidación e ampliación dos establecementos adheridos ao sistema de calidade do Instituto para a Calidade Turística de España (ICTE).

O SICTED na provincia está aliñado co Plan Estratéxico de Turismo Rías Baixas 2021-2023, que marca entre os seus obxectivos a mellora da competitividade do destino e contempla accións encamiñadas a espallar o compromiso coa calidade en eidos como a sostibilidade e a dixitalización.

Ao abeiro deste servizo impartirase formación convencional, como idiomas ou atención ás e aos clientes, e tamén se sensibilizará e formará ao sector turístico en busca dunha provincia sostible e con servizos e prestacións innovadoras.

O SICTED no destino Pontevedra Provincia
A Deputación de Pontevedra é unha das Administracións máis veteranas na xestión do SICTED en España. Comezou a súa andaina en 2015 e, dende entón, chegou a acadar o pasado ano en FITUR o galardón á/ao mellor técnico de xestión SICTED, que foi concedido a Elina González, unha das responsables de Turismo Rías Baixas. Ademais, o destino Pontevedra provincia Turismo Rías Baixas é o que conta con máis certificados de calidade de toda España.

Neste momento a Deputación traballa con 350 empresas de toda a provincia e de tódolos subsectores relacionados co turismo. Ao abeiro deste asesoramento provincial hai 302 empresas xa distinguidas co selo SICTED, das cales 6 poderán optar á Q de Calidade. Estas empresas recibirán ou renovarán a súa distinción polo traballo realizado durante este ano na Gala Provincial do Turismo, que se celebrará a finais de febreiro.

No 2021 a institución provincial ampliou o desenvolvemento do Plan de Formación dando un salto ao mundo dixital e facilitando así a conciliación dos negocios para acceder á formación. Ademais, a Deputación tamén deu asesoramento a empresas para a implantación do ciclo especial Covid-19 para o que o SICTED puxo en marcha o distintivo “Preparado Covid-19” que foi concedido a 37 empresas de diferentes oficios e concellos que se adaptaron ás boas prácticas de redución do risco de contaxios.

Deixa unha resposta

Este sitio emprega Akismet para reducir o spam. Aprende como se procesan os datos dos teus comentarios.

Outros artigos