Portomarín | O director de Turismo de Galicia, Xosé Merelles, e o delegado territorial da Xunta en Lugo, Javier Arias, visitaron esta tarde o posto de atención permanente de Cruz Vermella en Portomarín para pechar a quinta edición do programa ‘Contigo no Camiño’. Esta iniciativa, desenvolta de Cruz Vermella, co apoio da Xunta de Galicia, contribúe a reforzar a seguridade e a atención dos peregrinos no Camiño de Santiago, concretamente no Francés, durante os meses centrais do verán.
Desde o 7 de xullo e a falta de que este domingo 7 de setembro se peche esta edición, realizáronse máis de 1.500 asistencias sanitarias no tramo galego do Camiño Francés e 900 asistencias informativas. Delas, a maior parte correspondéronse con atencións leves, como feridas nos pés, dores musculares, contusións ou picaduras de insecto.
Como outros anos, contribuíuse ademais á mellora da experiencia das persoas camiñantes mediante o apoio informativo, con máis de 900 asistencias deste tipo nas que se forneceu información xeral das etapas, a súa dificultade, lugares nos que durmir, comer ou visitar.
O director de Turismo de Galicia enmarcou a iniciativa no traballo da Administración por mellorar as rutas xacobeas, o que entronca directamente co Plan Director dos Camiños de Santiago de cara ao Xacobeo 2027. “Desde o Goberno autonómico traballamos por garantir unha experiencia satisfactoria para os peregrinos”, subliñou, agradecendo a persoal e voluntariado “por axudarnos neste obxectivo común”.
Ademais, Xosé Merelles lembrou que pese a que os incendios rexistrados en agosto se produciron preto do Camiño Francés, “case 35.000 peregrinos optaron por percorrelo o mes pasado”.
Novidades desta edición
Este ano, como novidade, introduciuse a cobertura desde O Cebreiro e incrementouse un equipo de socorristas sumando un total de catro nesta edición. Ademais, o albergue Casa Forte de Lusío, en Samos, foi o centro loxístico para as etapas en Lugo e tamén aloxou aos voluntarios participantes.
O dispositivo contou, ademais de co posto permanente en Portomarín, con 4 equipos de socorristas itinerantes. Estas patrullas contan con formación en primeiros auxilios, desfibrilación semiautomática, xeolocalización, medio ambiente e igualdade de xénero. Os equipos están dotados dun botiquín de primeiros auxilios, un desfibrilador semiautomático (DESA) e un xeolocalizador.
Desde 2021, os equipos de ‘Contigo no Camiño’ percorreron máis de 27.000 quilómetros do Camiño, atendendo directamente a máis de 7.000 persoas. Delas, o 53% das asistencias foron de carácter sanitario.
Estatísticas
O Camiño Francés supón a principal ruta xacobea. Nos oito primeiros meses do ano, 170.352 persoas recolleron a Compostela tras percorrer este itinerario, un 2% máis que no mesmo período de 2024. Deles, 74.906 foron de procedencia estranxeira, o 45% do total. Por países de procedencia, o 7,4% foron de Estados Unidos, o 4,3% de Francia, o 2,8% de México.
Sumando todas as rutas, no que vai de ano rexistráronse 373.688 peregrinos, dos que o 64% procederon de fóra de España. En xeral, foi un 5% máis que en 2024. O Camiño Francés é o máis percorrido co 45,7% de peregrinos, seguido do Portugués que o recorren o 19% .