Ourense | O secretario xeral de Emprego e Relacións Laborais, Pablo Fernández, participou en Expourense na inauguración do congreso Ourense Territorio Emprendedor 2025. Valorou a futura Estratexia de emprendemento ligado ao territorio na que traballa o Goberno galego e que ten entre os seus sete obxectivos principais impulsar e especializar máis a Rede de polos de emprendemento, con novidades como sumar ás oficinas fixas outras itinerantes para apoiar as zonas máis pequenas e rurais.
Esta Rede de polos conta con 15 centros en toda Galicia, entre eles os catro da provincia de Ourense (Verín, O Carballiño, O Barco de Valdeorras e Baños de Molgas), que levan máis de mil proxectos atendidos e unhas 115 empresas novas creadas. Entre as iniciativas asesoradas predominan os servizos, a hostalaría e o comercio.
O secretario xeral destacou que o persoal técnico dos catro Polos ourensáns ten realizado máis de 3.300 titorías e unhas 490 actividades entre reunións con entidades do territorio, eventos e accións formativas. Lembrou o seu importante labor a prol da remuda dos negocios vencellados estreitamente co territorio, que se verá apoiado en 2026 co incremento ata os 1,5 M€ do Bono Remuda, dentro da orde única de axudas para persoas traballadoras autónomas que estará dotada con case 41 millóns de euros en total.