Salceda de Caselas | O Campus de Verán do CB Caselas volveu a rexistrar unha gran acollida na súa quinta edición, esgotando as 40 prazas dispoñibles en apenas catro días desde a apertura do prazo de preinscrición. A actividade, que se celebrará este verán en Salceda de Caselas, consolídase como unha das propostas deportivas máis salientables da zona, combinando adestramentos de baloncesto con actividades lúdicas e formativas dirixidas a mozos xogadores e xogadoras. O campus contará cun equipo técnico formado por cinco adestradores, alén de persoal de apoio e diferentes persoas invitadas ao longo da semana, co obxectivo de ofrecer unha experiencia completa tanto a nivel deportivo como privado.
Entre as presenzas confirmadas destaca a de Diego Gómez González, actual axudante principal do Club Ourense Baloncesto (LEB Oro). O técnico ourensán, con experiencia en clubs como Blanco Amor e Marín Peixegalego e unha etapa internacional en Taiwán, participará nunha xornada específica o xoves 26 de xuño, centrada no traballo de formación cos xogadores e xogadoras do campus. Como unha das actividades máis salientables, esa mesma xornada celebrarase un torneo 3×3 e distintas competicións na praza do Concello de Salceda, nunha tarde aberta que busca achegar o baloncesto a todo o municipio.
O campus forma parte do crecemento continuo do CB Caselas, un club con preto de 40 anos de historia que na actualidade reúne ao redor de 150 xogadores e xogadoras, consolidándose como unha das entidades deportivas de referencia na comarca. Desde a organización subliñan que a rapidez en completar as prazas reflicte a evolución do proxecto nos últimos anos e a confianza das familias na actividade. O CB Caselas continúa así reforzando unha iniciativa que aposta polo baloncesto base e a formación integral das persoas participantes.