Barcelona | A figura do deputado republicano Alejandro Viana, o “Schindler galego”, chega a Barcelona a próxima semana da man de Belagua Edicións e Roberto Mera, autor de Alejandro Viana. A proeza do rescate dos refuxiados republicanos.
O libro, publicado orixinalmente en galego, recibiu o Premio de Investigación e Ensaio Antón Losada Diéguez no ano 2022. O autor do libro, o avogado e politólogo Roberto Mera Covas (Ponteareas, 1971), biógrafo e sobriño bisnieto de Alejandro Viana, participará en dous actos para difundir a súa traxectoria e actuación en 1939 e 1940 en Francia.
O mércores día 26 na Llibreria a Memòria, estará acompañado polo Molt Honorable Sr. Artur Mas, 129è president da Generalitat; ao día seguinte, presentará o libro no Ateneu Roig, nun acto organizado pola Asemblea Cultural Galega de Barcelona. Roberto Mera narra neste libro a extraordinaria odisea iniciada o 18 de xullo de 1936 polo seu tío bisavó, recuperando para a historia a proeza dun home íntegro e entregado aos demais.
Na Europa ocupada polos nazis miles de exiliados republicanos españois ansiaban chegar a América para salvar as súas vidas. Entre eles atopábase Alejandro Viana Esperón (Ponteareas, Galicia, 1877-México DF, 1952), deputado republicano de esquerdas a quen ben se podería alcumar como o Schindler galego. Á fronte de varias organizacións humanitarias, entre elas o Servizo de Evacuación de Refuxiados Españois, Alejandro Viana organizou desde Francia a saída duns 17.000 refuxiados nunha trintena de expedicións marítimas colectivas a distintos países de América, na súa maioría a México.
Cos alemáns en Francia, Viana arriscou a súa vida para continuar axudando aos exiliados ata que, acosado pola Falanxe e a Gestapo, emprendeu en 1941 unha desesperada fuxida. Tras once meses de angustiante viaxe por África, logrou chegar a México. Aí reencontrouse tempo despois coa súa muller, tras once anos de separación, e viviu coa certeza de que xamais podería volver á súa terra. O libro e a figura de Alejandro Viana Esperón foron difundidos desde 2021 e ata a actualidade a través de máis de 100 actos en Galicia, ducias de reportaxes e entrevistas en medios de comunicación escritos e audiovisuais galegos, así como en medios estatais como A Noite en 24 horas de RTVE.
Agora, a súa difusión, a través da edición do libro en español, chega a Catalunya. AXENDA DE ACTOS Mércores 26 de novembro, ás 19:00 h, na Llibrería A Memòria, Plaça da Vila de Gràcia, 19. O autor estará acompañado do Molt Honorable Sr. Artur Mas 129è president da Generalitat. – Xoves 27 de novembro, ás 19:00 h, no Ateneu Roig, C/Torrent d’en Vidalet, 32.
O autor estará acompañado de Moisés Gil, representante da Asemblea Cultural Galega de Barcelona, e da arqueóloga, Irene Martínez de Alegría.