Ourense | O presidente provincial, Luís Menor, mantivo hoxe unha reunión de traballo coa directiva do Colexio de Economistas de Ourense, encabezada pola súa decana, Carmen Sampayo, na que ambas institucións acordaron renovar a súa colaboración e impulsar a reactivación do Observatorio Económico da provincia.
Luís Menor puxo en valor o papel do Colexio de Economistas de Ourense, que conta con máis de 400 profesionais asociados e cunha incidencia directa na vida económica da provincia, especialmente pola súa relación co tecido produtivo, asociacións empresariais e polígonos industriais.
O presidente provincial felicitou ademais á decana, Carmen Sampayo, polo seu recente nomeamento como vicepresidenta primeira do Consello Galego de Economistas, destacando que este recoñecemento “pon en valor o traballo realizado polo Colexio de Economistas de Ourense e reforza a presenza da provincia nos órganos autonómicos de decisión”.
No transcurso da reunión, ambas entidades acordaron renovar o convenio de colaboración que manteñen desde hai anos, considerado un instrumento “moi positivo” para ambas institucións, ao tempo que se abordou a reactivación do Observatorio Económico da provincia de Ourense.
Segundo explicou Menor, este observatorio permitirá contar cunha ferramenta de análise para a toma de decisións económicas e para coñecer con maior precisión a evolución da actividade económica na provincia. “Trátase dun proxecto moi interesante que servirá de guía para adoptar decisións e seguir de preto o día a día da economía ourensá”, sinalou o presidente.
Pola súa banda, a decana do Colexio de Economistas de Ourense, Carmen Sampayo, agradeceu a recepción e destacou a importancia da colaboración coa Deputación, subliñando que esta cooperación “repercute directamente nos máis de 400 economistas da provincia e no conxunto do tecido produtivo”.
Sampayo tamén incidiu na importancia de que as provincias do interior teñan presenza e capacidade de decisión nos órganos autonómicos, ao tempo que avanzou o compromiso do Colexio de seguir implicado na xeración de coñecemento e na súa transferencia á sociedade, especialmente a través da reactivación do Observatorio Económico.