• Segue conectado
  • |

A Deputación da Coruña financiará a contratación de 238 persoas a través do PEL-PEMES

A través do PEL-PEMES destínanse preto de 3 millóns de euros á concesión das axudas á realización de novas contratacións e ao mantemento das indefinidas realizadas ao abeiro da convocatoria anterior

Deputacion da Coruña | A Deputación da Coruña vén de publicar no Boletín Oficial da Provincia (BOP) a resolución de concesión das axudas á contratación de PEL-PEMES Creación e Ampliación do cadro de persoal e de PEL PEMES Mantemento do cadro de persoal das que se beneficiarán un total de 238 microempresas, pemes e persoas profesionais autónomas con domicilio fiscal en municipios de menos de 20.000 habitantes da provincia.

González Formoso destaca que “o obxectivo do PEL é fomentar a creación de emprego estable e de calidade, especialmente nos concellos máis pequenos e rurais da provincia”

A presente corporación, consciente da situación socioeconómica actual, marcada pola pandemia ocasionada pola COVID-19 decidiu suplementar o crédito destinado a estas convocatorias e conceder todas as axudas solicitadas a aquelas empresas que cumprisen os requisitos esixidos nas bases reguladoras. De aí que, finalmente no caso de PEL PEMES Creación e Ampliación o crédito inicial de 2 millóns de euros se vise incrementado para poder conceder axudas a 182 empresas, que supoñen un total de 2.248.264,31 euros; e no caso de PEL PEMES Mantemento o crédito de 500.000 euros se suplementase superando os 516.368,20 euros necesarios para conceder a axuda as 56 empresas solicitantes que cumprían todos os requisitos.

Desde a súa creación, as diferentes liñas do PEL impulsaron a creación de máis de 3.000 empregos directos na provincia da Coruña

O presidente da Deputación, Valentín González Formoso, destaca que “o obxectivo do PEL é fomentar a creación de emprego estable e de calidade, especialmente nos concellos máis pequenos e rurais da provincia”.

PEL PEMES Creación e Ampliación do cadro de persoal
Un total de 182 autónomos, autónomas, microempresas e pemes de concellos de menos de 20.000 habitantes da provincia levarán a cabo novas contratacións de persoal inscrito como demandante de emprego nos Servizos Públicos de Emprego grazas a que as axudas do PEL-PEMES financiarán o 70% dos custes do primeiro ano da contratación, incluíndo os gastos de soldos e salarios e Seguridade Social, impulsando así a actividade empresarial das zonas con menor poboación da provincia e apoiándoas en momentos difíciles na creación de emprego. Ademais, resulta destacable que máis da metade, concretamente o 54,4%, das contratacións serán realizadas con carácter indefinido.

En canto á distribución das axudas por concellos, os que teñen un maior número de solicitudes concedidas son os seguintes: Santa Comba (12 por importe total de 151.200,00 €), Mazaricos (10 por importe total de 127.739,50 €), Bergondo (8 por importe total de 103.568,52 €), Cee (8 por importe de 87.080,00 €) e Vimianzo (8 por importe de 97.158,59 €). Por comarcas destacan a do Xallas, con 22 solicitudes concedidas e un total de 278.939,50 €, a de Fisterra con 20 solicitudes concedidas e un montante de axudas por importe de 231.980,00 € e a de Terra de Soneira con 17 solicitudes concedidas e unha contía de subvencións de 197.957,59 €.

Atendendo á tipoloxía de negocio, a meirande parte das entidades beneficiarias son microempresas (empresas con 10 ou menos traballadores/as), representando máis da metade do total, mentres que os autónomos e autónomas supoñen arredor do 40%. A parte restante, é dicir, menos do 10% corresponde a pequenas e medianas empresas.
As empresas deberán dedicar a subvención a contratacións de duración igual ou superior a un ano. As persoas a contratar deberán estar empadroadas en calquera dos municipios da provincia da Coruña, ademais de atoparse en situación de desemprego no momento da contratación e inscritas como demandantes de emprego nos Servizos Públicos de Emprego.

PEL PEMES Mantemento do cadro de persoal
Por outra banda, as axudas do PEL PEMES Mantemento incentivan o emprego estable e de calidade, subvencionando o segundo ano de contrato das persoas traballadoras contratadas ao abeiro da convocatoria de PEL PEMES Creación e Ampliación 2019 na modalidade de contrato indefinido.

Grazas a concesión destas axudas un total de 56 profesionais autónomos e autónomas, microempresas e pemes de concellos de menos de 20.000 habitantes da provincia recibirán unha subvención do 50% dos custes laborais, incluíndo os custes de soldos e salarios e seguridade social, das persoas traballadoras contratadas con carácter indefinido en 2019.

Atendendo á distribución das axudas concedidas por concellos destacan Curtis, con 6 axudas por importe de 56.000,00 €; Boiro, con 4 axudas por importe de 36.499,00 €; Mazaricos, con 3 axudas por importe de 28.000,00 € e Santa Comba, con 3 axudas por importe de 29.000,00 €. Por comarcas, as que contan cun maior número de solicitudes concedidas e, por ende, reciben un maior montante de axudas son as seguintes: Betanzos, con 7 solicitudes concedidas e 65.000€ de axudas; Ordes, tamén con 7 solicitudes concedidas e un importe en axudas de 60.820,54 €; Xallas, con 6 que supoñen 57.000,00 € en subvencións e Fisterra, tamén con 6 axudas concedidas e unha contía de 49.316,98 €.

En canto a tipoloxía do negocio das entidades beneficiarias, a meirande parte son microempresas, supoñendo un 55% do total, seguidas de profesionais autónomos/as, cun 39% do total. A porcentaxe restante, é dicir, o 6% corresponde a pequenas e medianas empresas.

Coa concesión destas axudas o PEL continúa a súa senda de xeración de emprego estable de calidade na provincia, impulsando a creación de novos postos de traballo que xa son máis de 3.000 desde a súa posta en marcha no ano 2016.

A listaxe completa das empresas que se beneficiarán este ano das axudas de PEL PEMES Creación e Ampliación do cadro de persoal e PEL PEMES Mantemento do cadro de persoal pode consultarse nesta ou nesta ligazón.

Publicado o 24 Ago 2020 en Deputación da Coruña, Portada, Traballo.
Síguenos na nosa canle en TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies