• Segue conectado
  • |

Vigo propón un deseño da terminal de autobuses acorde á estación de Thom Mayne

Abel Caballero pide á Xunta de Galicia un deseño "coherente" da estación de autobuses -que estará nun lateral da estación do AVE- co entorno e a arquitectura de Mayne.

Vigo | Este venres, o alcalde deu conta da reunión celebrada onte entre as tres administracións e a empresa Immochan, adxudicataria da construción da gran estación do AVE de Urzáiz, unha cita na que se abordaron distintas cuestións sobre o encaixe da terminal ferroviaria e de autobuses.

A estación de autobuses estará nun lateral da estación do AVE ideada por Mayne, polo que o Concello de Vigo, co acordo de ADIF e de Immochan, propuxo que o seu deseño sexa “harmónico” co entorno e “coherente” coa arquitectura da estación do AVE. Neste punto, anotou Caballero, a Xunta afirmou na reunión que ten un proxecto propio. Sen entrar a prexuzgar o deseño nin o traballo do arquitecto encargado deste, o alcalde solicitou coñecelo e agarda que sexa “acorde” á estación do AVE de Thom Mayne.

Ademais, segundo explicou Caballero, as partes avanzaron no deseño da Praza da Estación, a entrada frontal á terminal ferroviaria, que será remodelada para dar cabida, por exemplo, aos lineais de taxis, aos autobuses e aparcamentos para bicis e motos, tamén os accesos á futura estación de autobuses. A este respecto, o alcalde puxo en valor os avances acadados e a “boa disposición” de todos.

Concello, ADIF, Xunta e Immochan tamén estudaron onte o encaixe e coordinación dos cronogramas das distintas obras a executar. Caballero engadiu que o obxectivo é que todos os accesos da Praza da Estación, das conexións coa estación do AVE e coa autoestrada estean operativos cando Immochan remate a súa obra. O rexedor concedeu “a maior importancia” á cuestión, na que tamén hai acordo entre as partes. Así, o Concello conta no orzamento deste ano cunha partida reservada para os accesos, por exemplo o derrubo do paso elevado de Lepanto e a construción de parte do futuro túnel que conectará o citado vial coa autoestrada.

Publicado o 23 Mar 2018 en Portada, Vigo.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies