• Segue conectado
  • |

Uxío Novoneyra, Poeta do Courel.

O Courel é tamén a terra na que naceu Lola, a miña dona. Temos viaxado e feito saborosas excursións polos seus montes e devesas, bañado nos seus ríos e fervenzas e visitado as súas vilas, aldeas e castros. Por iso, estamos agradecidos aos que puxeron en valor e deron a coñecer esta fermosa terra: Anxel Fole, Uxío Novoneyra e Olga Novo -entre outros. Uxío Novoneyra naceu en Parada de Courel en 1930 e finou en Compostela en 1999. Foi un poeta e escritor de familia labrega e o Courel, a súa terra, foi o principal referente dos seus versos, por iso chegou a ser coñecido como o Poeta do Courel. Estudou bacharelato en Lugo e despois matriculouse por libre na facultade de Filosofía e Letras en Madrid, onde traballou na radio e na televisión en progamas culturais e literarios. Regresa ao Courel e máis tarde trasládase a Santiago de Compostela, onde exerce como presidente da Asociación de Escritores en Lingua Galega. En 1968 coñece en Lugo a Elba Rei, coa que casa en 1973. Tratou a Manuel María, Maside, Otero Pedrayo, María Mariño,… As súas principais obras son: Os Eidos (de 1955), Elexías do Courel e outros poemas (de 1966), Poemas caligráficos (de 1979), Muller pra lonxe (de 1986),… En 2010 adicouselle o Día das Letras Galegas . Galiza sempre está presente na súa literatura e o idioma era para el o único sitio onde siguen vivos os nosos devanceiros e a única forma audíbel de supervivencia. Contarei unha anécdota que lin del: na posguerra un tío de Uxío estaba alapado na casa familiar, pois corría perigo a súa vida. E el, sendo tan só un neno, deprendeu a gardar silencio ao respecto. Como mostra da súa obra, escollín estes breves e fermosos poemas:

TERRA moura das montañas!
Boa terra que dás auga
e teis auga nas entrañas!

* * *

CANTA o cuco cala e canta
dos castiñeiros do val.
Pasa o tempo e non di nada
e volta o cuco a cantar.

* * *

ALALÁS ENCADEADOS
É xa hora de que señas
Terra patria dos teus
dos que gardaron a fala
en que máis se dixo “adeus”
e que señas dona de ti
e señora de falar
señora de decidir
e dona de se negar.

Publicado o 16 Mai 2017.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies