• Segue conectado
  • |

“Queremos que os nosos polígonos sexan competentes”

Teresa Pedrosa | Delegada do Estado para a ZFV

Pilar Martínez | Teresa Pedrosa (Pontevedra, 1964), delegada do Estado para a ZFV desde 2012, conta cunha longa traxectoria profesional e política, como inspectora na Inspección de Traballo e Seguridade Social, presidenta do Consello Galego de Relacións Laborais, deputada provincial e concelleira na cidade de Pontevedra .Pese ás dificultades que supón xestionar unha entidade como o Consorcio da Zona Franca de Vigo, amósase satisfeita dos obxectivos acadados nestes anos nos distintos polígonos industriais que o conforman.

O pleno da Zona Franca vén de aprobar os orzamentos para 2017, que ascenden a 41 millóns de euros. Considera que será posible executar os proxectos que nel se contemplan, como a ampliación do Parque Tecnolóxico, por exemplo?

Efectivamente, o pleno aprobou o seu orzamento de 41 millóns e unha cifra de negocio de 20 millóns, co que presentamos un resultado positivo para o Consorcio e cunha gran capacidade investidora. Pretendermos investir nos tradicionais polígonos industriais como o PTL e o de Balaídos, pero tamén queremos continuar da man do Porto e da Xunta na PLISAN. Desde logo, o meu desexo é que o orzamento se execute.

Porén, o documento orzamentario non inclúe o convenio coa ETEA. Ata que punto o impide a posición do alcalde cando afirma que sacar adiante ese convenio suporía regalarlle os cartos á Xunta?

O Consorcio está formado por distintas institucións e preidido polo alcalde que incumpriu as súas obrigas de convocar os plenos, tal e como establece a norma. Ademais, non quixo tratar o convenio na orde do día, convenio que pretende apoiar a outras institucións como a Universidade de Vigo. Exerceu o seu dereito a veto, e veremos se vai adiante. O desexo do Comité Executivo é levar a cabo a colaboración en investigación nun tema tan importante como o relacionado co mar; pero non só referido á construción naval –que tamén-, senón á gastronomía, ao turismo en todas as súas diferentes vertentes.

Retomando un proxecto fundamental que vostede mencionou máis arriba, o da PLISAN, en que punto se atopa a súa urbanización?
O Consorcio foi a primeira institución que actuou con visión metropolitana, xa que proxectou a PLISAN como porto seco do Porto de Vigo. Despois de anos de moitas dificultades, agora temos resoltos a maior parte dos conflitos pola vía xurídica. E nestes momentos está en redacción o proxecto de máis de 500.000 m2 de superficie.

“Queremos que os nosos polígonos sexan competentes e ofertaremos os primeiros 100.000 m2 da PLISAN a 50 euros o metro”

En Portugal estanse ofertando miles de metros cadrados de superficie a prezos moi baixos. Pensa que este feito repercutirá no interese que esperte nas empresas asentarse na Plataforma Loxística PLISAN? A que prezo se cobrarán os terreos?

Nós sacamos uns prezos estimados nos diferentes polígonos da xeografía galega. De feito, no único polígono industrial no que actualmente temos terreos é en Porto do Molle, en Nigrán. A nosa obriga é facer que os polígonos sexan o máis atractivos posible e por iso sacaremos os primeiros 100.000 m2 da PLISAN a 50 euros o metro cadrado.

Por concretar un pouco máis, hai datos de cantas empresas teñen mostrado interese por instalarse na PLISAN?

Aínda non están a disposición as parcelas, pero si que hai empresas interesadas na súa urbanización. Confiamos en acadar o cen por cen de ocupación, ao igual que nos polígonos de Balaídos, no PTL, en A Granxa e en Bouzas. A nosa ilusión é que a PLISAN sexa o motor do sur de Galicia, que teña conexións intermodais e con moitas vantaxes para que sexa competitiva. Calquera que queira pode achegarse e ver que a súa comunicación interior é imparable. O obxectivo é que calquera empresa que queira poida asentarse.

Actualmente, falta algo por aboarlle aos afectados, como comuneiros e particulares?
A maior parte dos problemas resolvéronse a través de sentenzas, que se están executando e por suposto estase facendo fronte aos pagos correspondentes.

Cumpríronse recentemente cinco anos do seu nomeamento como delegada para a ZFV. Que balance fai deste período?

Estou moi satisfeita porque, cando cheguei, hai cinco anos, efectivamente, observamos que o polígono industrial máis forte, o de Balaídos, tiña moitas carencias, polo que asumimos unha gran transformación que permitiu adxudicar novos modelos á factoría alí instalada. Ademais atopei que en Porto do Molle só había unha empresa instalada e agora teño a honra de poder dicir que hai máis de 120. Por outra banda, metémonos de cheo en sectores que non tiñan forte presencia en Galicia e fomos capaces de poñer en marcha un viveiro aeroespacial e que novas empresas sexan unha realidade.

Que retos se marca para os vindeiros anos?

Teño o obxectivo de conseguir que haxa máis empresas e máis traballadores no Consorcio da Zona Franca de Vigo, pero tamén de levar con normalidade as relacións que eu non rompín. Ademais quero poder executar proxectos fundamentais para o desenvolvemento industrial de Vigo. Estamos na sociedade do coñecemento, polo que ademais de apoiar o ladrillo é necesario apoiar o coñecemento.


Xornalista. Estudou Filosofía, Traballou no departamento Prensa e Comunicación do Grupo Municipal BNG Concello de Vigo. Colabora en varios xornais galegos. Colaboradora no Concurso de Microcatrorelatos do Café De Catro a Catro.
Publicado o 16 Mar 2017 en Entrevistas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies