• Segue conectado
  • |

Ponte… nas ondas! premiada polo seu labor a prol do patrimonio común

A Fundación Peña Novo vén de fallar a XXIII edición dos premios pola defensa e promoción da lingua galega. Ponte...nas ondas! é o colectivo premiado ao lado de Xurxo Mariño e de Sandra Piñeiro nos seus respectivos ámbitos

Ponte nas Ondas

O pasado 29 de xuño Ponte…nas ondas! recibiu o premio Peña Novo pola labor desenvolvido ao longo de dúas décadas a prol do patrimonio inmaterial galego-portugués. O xurado valorou a contribución de Ponte…nas ondas! na dinamización e transmisión do patrimonio no ámbito educativo e cultural a través da radio, Internet, as novas tecnoloxías e as redes sociais.

Destaca tamén o xurado o achegamento a diversos sectores sociais a partir das comunidades de portadores que transmitiron os seus coñecementos nas aulas e nas actividades de dinamización realizadas por todo o territorio da Eurorrexión.

Tamén se recoñece no galardón o traballo realizado por antropólogos, filólogos e investigadores de Galicia e do Norte de Portugal arredor de Ponte…nas ondas! para que a asociación fose recoñecida pola UNESCO como ONG consultora para o patrimonio inmaterial.A transmisión da lingua, e do seu patrimonio, ás novas xeracións é o labor que o xurado valora especialmente pola súa importancia no momento actual de perda de uso nas idades máis novas.

No acto de entrega dos premios actuou o grupo Luar na lubre e contou coa asistencia do Conselleiro de Educación e Cultura, o Secretario Xeral de Política Lingüística e o Deputado de Cultura da Deputación de Pontevedra.

NA REDE DO PATROMIO

Ponte…nas ondas! está impulsando xunto con máis de 50 entidades a Rede de Patrimonio Cultural de Galicia. Unha rede que nace coa vontade de colaborar na defensa do noso patrimonio cultural e na posta en valor das súas expresións e manifestacións.

A súa constitución tivo lugar o pasado sábado 3 de xuño no Museo do Pobo Galego onde 33 asociacións presentes ratificaron o acordo fundacional da Rede.

A Rede servirá coma un instrumento de axuda e unha ferramenta de difusión das actividades de todas as asociacións e entidades que participan dela e tamén para promover accións e campañas en defensa do noso patrimonio cultural en ámbitos institucionais, sociais e territoriais.

A Rede tamén apoiará campañas que non só se subscriban á Galicia territorial, senón tamén campañas que abrangan outros espazos, coma o norte de Portugal ou as zonas fronteirizas de Asturias e de Castela e León. Neste senso, dará apoio a iniciativas como a de Ponte…nas Ondas! relacionadas co patrimonio común galego-portugués.

Ponte…nas ondas! realizou a XIII edición da súa xornada de radio interescolar baixo o lema Na Rede do patrimonio en 2007.

Publicado o 5 Xul 2017 en Aldea Global.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario. Si continúa navegando está a dar seu consentimento para a aceptación das mencionadas cookies e a aceptación da nosa política de cookies. Faga click no enlace para maior información. ACEPTAR

Aviso de cookies