• Segue conectado
  • |

Ponte…nas ondas! acreditada pola UNESCO como ONG consultora do patrimonio inmaterial


MalvelaGalicia |
Na 10ª sesión do Comité Intergobernamental para a Salvagarda do Patrimonio Inmaterial celebrada en Windhoek (Namibia) do 30 de novembro ao 4 de decembro, a asociación converteuse na primeira entidade galega en ser acreditada como asociación consultora do patrimonio inmaterial.

A Convención para a Salvagarda do Patrimonio Inmaterial recolle no seu artigo 11b que os Estados deberán contar coa participación das Asociacións para a identificación, salvagarda e definición do patrimonio cultural inmaterial. Para conseguir a acreditación da UNESCO, as ONGs deberán ter probada competencia, coñecementos especializados e experiencia na salvagarda do patrimonio inmaterial. Ademais, demostrarán ter como mínimo acreditados catros anos de actividades e presentarán unha descrición das experiencias en materia de cooperación coas comunidades, os grupos e os profesionais do PCI (Patrimonio Cultural Inmaterial).

Unha vez presentado o expediente na Secretaría da UNESCO, verifícase toda a documentación e apróbase o seu envío ao Comité Intergobernamental. Este comité somete os expedientes á aprobación e á súa vez, envíaos á Asemblea Xeral que ratifica a conformidade das recomendacións do Comité. O expediente de PNO! foi informado pola Secretaría positivamente, resultou aprobado polo Comité e próximamente será refrendado na seguinte Asemblea Xeral que terá lugar en xuño de 2016.

EQUIPO SOLVENTE
A asociación Ponte…nas ondas! está integrada maioritariamente por profesorado de ensino público ( escolas, institutos e universidades ) de Galiza e do Norte de Portugal. Desde hai 20 anos vén desenvolvendo un labor de transmisión e posta en valor do patrimonio inmaterial galego-portugués no ámbito educativo e tamén no cultural cunha importante actividade pública de promoción e recoñecemento deste patrimonio.

Ademais, conta con destacados especialistas no ámbito do patrimonio inmaterial que defenden a existencia do patrimonio común galego-portugués e que veñen realizando tareas de estudo e investigación en diversos eidos relacionados con esta cultura común:

• Alexandre Parafita. Profesor da Universidade de Tras-os-Montes e Alto Douro (Portugal). Doutor en Cultura Portuguesa e mestre en Ciencias da Comunicación, especialidade de Antropoloxía da Comunicación.
• Álvaro Campelo. Profesor de Antropoloxía da Universidade Fernando Pessoa, Porto. Portugal.
• Carlos Nogueira. Profesor na Universidade Nova de Lisboa e na Universidade de Vigo. Especialista en Literatura Oral.
• Ria Lemaire. Profesora da Universidade de Poitiers (Francia). Especialista en literatura oral galego-portuguesa.
• Camiño Noia. Catedrática de Filoloxía Galega da Universidade de Vigo. Especialista en literatura oral galego-portuguesa.
• Xosé Manuel González Reboredo. Antropólogo. Membro do Museo do Pobo Galego e do Consello da Cultura Galega.
• Antonio Reigosa. Escritor e investigador da cultura galego-portuguesa de transmisión oral.
• Xosé Manuel Cid. Profesor de Pedagoxía na Universidade de Vigo. Especialista en pedagoxía e didáctica da transmisión do patrimonio.

FUNCIÓNS CONSULTIVAS
PNO! poderá exercer as función consultivas que o Comité Intergobernamental da UNESCO lle solicite, referidas a expedientes presentados para inscribir elementos na Lista Representativa do Patrimonio Inmaterial. Pode ser consultada en programas, proxectos e actividades relacionados co artigo 18 da Convención e no impacto dos plans de salvagarda dos elementos inscritos na Lista de Salvagarda urxente.

COÑECEDORES DO PATRIMONIO INMATERIAL GALEGO-PORTUGUÉS
PNO! foi a asociación promotora da Candidatura do Patrimonio Inmaterial Galego-Portugués á UNESCO, a primeira candidatura multinacional nacida a partir de centros educativos. Ademais, sumáronse ao proxecto gran número de comunidades de portadores como as asociacións integradas na Federación Galega pola Cultura Marítima e Fluvial, as comunidades de montes e baldíos de Galiza e do Norte de Portugal, facultades universitarias, concellos, asociacións de artesáns ou de músicos tradicionais… O patrimonio oral galego-portugués é un referente universal na cultura pois a lírica medieval nacida desde unha tradición oral común é estudada e divulgada en diversas universidades de todo o mundo. Este patrimonio oral mantense vivo na actualidade e presenta unha unidade estrutural que perseverou a pesares da fronteira política establecida polos Estados.

HOMENAXE ÁS PERSOAS E COMUNIDADES PORTADORAS
Precisamente, o 25 de novembro, coincidindo co 10 aniversario da presenza do patrimonio inmaterial galego-portugués na sede da UNESCO en París, PNO! celebrou a GALA DO PATRIMONIO no Teatro Municipal de Tui. Un acto de recoñecemento ás persoas anónimas e ás comunidades que manteñen vivo o legado patrimonial a ambos lados da fronteira e que se sinten orgullosas de compartir unha cultura común.

Publicado o 14 Dec 2015 en Aldea Global, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies