• Segue conectado
  • |

Os “excelentísimos” balcóns.

Terminada xa a fogueira de 1936, Franco visitou Ourense. Esperábano as autoridades no Parque de San Lázaro, mais houbo un malentendido e o Generalísimo “Por la gracia de Dios” chegou coa súa comitiva directamente ao Concello, onde somentes estaba o xefe de protocolo, don Alejandro Rodríguez Veiras, e máis os maceiros e a Banda Municipal de Música, a praza a rebosar de xente chegada dos pobos ourensáns.

Pois ben, ao decatarse as autoridades de que Franco non se detiña no Parque de San Lázaro, empezaron a correr cara o Concello.

Elí o señor Rodríguez Veiras disculpouse como poido ante o Xefe do Estado, ata que chegaron, coa lingoa fora, o gobernador civil, o alcalde e o resto de autoridades nomeadas a dedo polos vencedores da triste fogueira que deixou máis dun millón de mortos por ambos bandos contendentes.

Xa no salón de sesións, Franco foi dándolle a man as autoridades, que se disculpaban como podían. Segundo me contou o señor Rodríguez Veiras, o Generalísimo puña unha cara de cabreo de non te menees.

Logo decidiu dirixirse á multitude que se apretuxaba na Praza Maior, e Ramón Puga, o director da única emisora que había na provincia, EAJ 57 Radio Ourense, máis tarde tío de Julio Iglesias, e que tiña un bazar no que hoxe é o Café Latino, dirixiuse ao pobo con estas palabras: “Orensanos, seguidamente os va a dirigir la palabra desde los “excelentísimos” balcones del Ayuntamiento el Generalísimo Franco”. Como así fixo entre aclamacións das xentes chegadas a nosa cidade dende os pobos limítrofes.

Franco somentes dixo, con aquela súa voz afrautada: “Españoles, hemos derrotado al comunismo y a los politicastros de la República”.
Mais o que se comentou durante todo o día foi o que dixera Ramón Puga, aquela mención a “los excelentísimos balcones del Ayuntamiento”. Temos que lembrar o noso pasado, sobre todo os que xa temos moitos abriles por riba do lombo.

Publicado o 12 Mai 2017 en Manuel Rego Nieto.
Síguenos no noso canal do TELEGRAM

Outros artigos

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies