• Segue conectado
  • |

Os concellos do Condado e A Paradanta inician o proceso de creación dun xeodestino turístico propio

NDEA_Alcaldes Condado ParadantaPonteareas | O acordo acadado entre os alcaldes de 10 concellos diferentes deberá ser aprobado polas respectivas corporacións locais.

As comarcas do Condado e A Paradanta poderían ter un xeodestino propio no curto prazo. Este é o desexo dos alcaldes de 10 concellos diferentes, que acordaron nunha reunión mantida a pasada semana no Salón de Plenos do Concello de Ponteareas iniciar os trámites que permitan situar a ámbalas dúas comarcas como enclave turístico de referencia, pasando a ser o décimo quinto xeodestino de Galicia.

O encontro valeu para que os respectivos rexedores municipais determinaran dous obxectivos principais na construción do novo xeodestino: facer participar dos beneficios do turismo á maior parte posible da poboación local de maneira que esta teña un papel activo na mellora do atractivo turístico da zona; e lograr que o aproveitamento turístico actúe como acicate nas diversas administracións e na sociedade civil, dedicando recursos que permitan poñer en valor o patrimonio histórico e biolóxico, impulsando un turismo sustentable.

Aprobación nos plenos municipais
O primeiro paso para poñer en marcha proxecto será conseguir a aprobación do mesmo por parte das corporacións locais de Arbo, A Cañiza, Covelo, Crecente, Mondariz-Balneario, Mondariz, As Neves, Ponteareas, Salceda de Caselas e Salvaterra de Miño.

Motor de arranque
No caso de contar co respaldo das diferentes corporacións, o proxecto xa ten previsto a elaboración dun Plan de Desenvolvemento Turístico onde se recollerá o inventario de recursos turísticos do Xeodestino e se determinará a capacidade de carga do medio, así como as medidas máis adecuadas a aplicar para o desenvolvemento do sector. Coa información recadada, levarase a cabo o desenvolvemento dun Plan de Dinamización Turística para os municipios que integran o potencial Xeodestino Terras do Condado – A Paradanta.

Xeodestino
A Xunta de Galicia entende por xeodestino“as áreas limítrofes que comparten homoxeneidade territorial baseadas nos seus recursos turísticos naturais, patrimoniais e culturais con capacidade para xerar fluxos turísticos e que, xunto á súa poboación, conforman unha identidade turística diferenciada e singular”.

Galicia conta, na actualidade, con 14 xeodestinos turísticos: Rías Altas; Rías Baixas; Costa da Morte, Terras de Santiago; Mariña Lucense; Lugo e a Terra Chá; Ancares-Courel; Ribeira Sacra; O Ribeiro; Terras de Ourense e Allariz; Celanova-Limia; Verín-Viana; Manzaneda-Tevinca; e Deza-Tabeirós.

Publicado o 16 Mar 2016 en Ponteareas, Turismo.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies