• Segue conectado
  • |

O Goberno propón á Xunta a creación en Ponteareas dun punto de encontro familiar para O Condado e A Paradanta

O único punto de encontro familiar existente para a zona está en Vigo e, en ocasións, mira excedida a súa capacidade.

encontro familiar ponteareas

Ponteareas | O Goberno local de Ponteareas presentará no vindeiro Pleno da Corporación, unha proposta para que o municipio conte cun punto de encontro familiar para as comarcas do Condado e a Paradanta. A iniciativa da Concellería de Benestar Social e Igualdade que xestiona Verónica Carrera, busca dar resposta ás persoas que precisen este servizo que, nos últimos tempos, ten incrementado a súa demanda.

Carrera explica, na súa proposta, a necesidade de contar cun equipamento “de carácter neutral” e que está especializado en regulamentar o réxime de visitas establecido pola autoridade competente “entre as familias e os menores, cando as primeiras pasan por unha situación de separación, divorcio, nulidade ou calquera outra circunstancia que interrompa a normal convivencia familiar” e sempre que “o exercicio do dereito de visitas se vexa interrompido ou o seu cumprimento resulte difícil ou conflitivo”.

A concelleira de Benestar Social e Igualdade, Verónica Carrera, considera que “é un servizo fundamental de cara a facilitar a relación entre as e os menores e as súas familias en situación de crise.

Segundo a concelleira de Benestar Social e Igualdade do Concello ponteareán, un servizo destas características “favorece a relación dos e das menores coas súas familias” amais de garantir e facer cumprir o réxime de visitas.

A necesidade de contar cun punto de encontro familiar en Ponteareas, afirma Verónica Carrera, vén dada polo feito de que “o único servizo destas características existente para a zona está en Vigo e, ás veces, non conta coa capacidade suficiente para atender a demanda”.

Por todo o antedito, o Goberno local que preside Xosé Represas, propoñerá ao Pleno “instar ao Goberno galego a realizar un estudo e valorar a viabilidade de crear un punto de encontro familiar en Ponteareas para os concellos das comarcas do Condado e Paradanta”.

Para o alcalde ponteareán “non se pode esquecer que Ponteareas é a cabeceira de dúas comarcas cunha poboación que supera os 60.000 habitantes e que, polo tanto, precisan de dispoñer de servizos de proximidade, como este punto de encontro familiar, que evite longos desprazamentos e, polo tanto, incremente a súa operatividade”.

Publicado o 20 Mai 2017 en Ponteareas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies