• Segue conectado
  • |

O goberno de Guinea-Bissau visita iniciativas de desenvolvemento local da man do Fondo Galego

Participará nas Xornadas ‘Os retos da cooperación municipalista na consecución dos Obxectivos de Desenvolvemento Sostible’ que se celebran o 31 de maio

Pontevedra | O ministro de Administración Territorial de Guinea-Bissau, Sola Naquilin, coñecerá do 29 de maio ao 1 de xuño diversas accións de desenvolvemento local e ordenamento do territorio convidado polo Fondo Galego de Cooperación e Solidariedade. A delegación africana, integrada tamén por responsables do Programa de Gobernación e Desenvolvemento Local impulsado pola ONU, comprobará o apoio que deputacións e concellos prestan a iniciativas empresariais, tecnolóxicas, urbanísticas e asociativas que buscan o progreso económico e social.

A comitiva iniciará o luns o percorrido por Galicia na Deputación de Pontevedra, onde lles dará a benvida a presidenta provincial, Carmela Silva, para trasladarse logo ao polígono industrial Barro-Meis e á Estación Fitopatolóxica do Areeiro, centro de investigación sobre as enfermidades dos cultivos. Pola tarde, serán recibidos polo alcalde de Pontevedra, Miguel Anxo Fernández Lores, e a concelleira de Promoción Económica, Anabel Gulías, que lles explicarán o premiado modelo urbanístico da cidade, logo de realizar un percorrido polo centro.

O martes arrincará cunha xuntanza coa Comisión Executiva do Fondo Galego, á que acudirán representantes dos concellos de Nigrán, Redondela, Pontevedra, Oleiros e da Deputación da Coruña. Está por confirmar asemade unha cita coa conselleira de Medio Ambiente e Ordenación do Territorio, Beatriz Mato. Con quen si se reunirán é coa Cámara de Comercio de Santiago de Compostela e coa Asociación Galega de Profesionais do Desenvolvemento Local, un encontro ao que tamén acudirá o alcalde de Vimianzo, Manuel Antelo. A xornada pecharase coa visita ao Centro de Emprendemento da Cidade da Cultura.

Alén do ministro de Administración Territorial, integran a delegación guineana o director de Servizos de Licenciamento e Incentivos ao Investimento, Micailo Biai; o director xeral do Programa de Gobernación e Desenvolvemento Local de Guiné-Bissau, Mahalam Mane; a asesora técnica principal de dito programa promovido polo Plan de Desenvolvemento de Nacións Unidas (PNUD), Angela Abdula, e mais Iván Arizcurinaga, consultor da mesma iniciativa, que busca promover o bo goberno, a prestación de servizos básicos e o acceso das poboacións máis vulnerables a oportunidades económicas, con enfoque de xénero.

Arizcurinaga falará sobre os municipios como receptores da cooperación ao desenvolvemento nas Xornadas ‘Os retos da cooperación municipalista na consecución dos ODS’ que o Fondo Galego organiza o 31 de maio Santiago de Compostela. O seminario porá de relevo o papel clave que teñen as administracións locais para acadar os 17 Obxectivos de Desenvolvemento Sostible, fixados polos estados membros da ONU co fin de erradicar a pobreza, protexer o planeta e asegurar a prosperidade para todas as persoas. O evento contará coa intervención doutras expertas e expertos chegados de Valencia ou do País Vasco, alén do vicepresidente da Xunta, Alfonso Rueda, ou do presidente da Fegamp, Alfredo García.

Tras asistir ás xornadas, a comitiva ministerial desprazarase a Lugo para coñecer a experiencia do viveiro de empresas CEI-Nodus, canda a alcaldesa Lara Méndez e outros membros do goberno local. A axenda culminará o 1 de xuño en Tomiño cunha recepción institucional encabezada pola rexedora, Sandra González, e unha visita ao mercado municipal.

As liñas estratéxicas do Fondo Galego de Cooperación e Solidariedade para a presente lexislatura apostan por acentuar a colaboración cos países lusófonos, especialmente os da África máis empobrecida, onde xa se impulsaron varios proxectos en Mozambique. Entre eles, un de apoio á Axencia de Desenvolvemento Económico Local e ao proceso de descentralización e planificación territorial da provincia de Maputo.

O Fondo Galego de Cooperación

O Fondo Galego de Cooperación e Solidariedade está integrado por 90 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur. Recoñecido como axencia municipal da cooperación galega, o Fondo Galego de Cooperación e Solidariedade chega en 2017 ao seu vixésimo aniversario.

Publicado o 26 Mai 2017 en Pontevedra, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies