• Segue conectado
  • |

O CDL acollerá o mércores a reunión da Rede de Cooperación do proxecto europeo Silvaplus

Subida ó Monte da Picaraña | Foto: Manoel Ucha


Ponteareas | O Centro de Desenvolvemento Local acollerá o vindeiro mércores, 15 de maio, a reunión da Rede de Cooperación do Programa Silvaplus, no que se definirán as accións de formación e divulgación que se van a realizar, durante este ano 2012, ao abeiro deste programa europeo.
Logo da apertura desta reunión que correrá a cargo do alcalde de Ponteareas, Salvador González Solla, que terá lugar ás 11:00 horas, darán comezo as sesións de traballo nas que se fará, en primeiro lugar, un recordatorio das actividades de formación e divulgación para, posteriormente, tratar cada unha delas de xeito máis específico.
Así, dentro das accións de formación, se definirán as áreas estratéxicas de formación; os cursos e seminarios a celebrarse; responsables dos mesmos e lugares de celebración e elaboración do correspondente calendario.
No que fai referencia ás actuacións de divulgación e comunicación, falarase das accións a desenvolver e dos responsables das mesmas; lugares de celebración e elaboración do calendario.
No proxecto, participan, por parte de Portugal a Asociación Forestal de Portugal (Forestis), a Área Alto Minho e a Autoridade Forestal Nacional, mentres que por parte galega están involucrados neste proxecto a Asociación Forestal de Galicia e os Concellos de Ponteareas e Tomiño.
O proxecto Silvaplus é unha iniciativa encamiñada a facilitar a mobilización de biomasa forestal nos montes e a promover a súa utilización como fonte enerxética na área transfronteiriza do norte de Portugal e do sur de Galicia. O Silvaplus busca, polo tanto, que a biomasa forestal que producen os nosos montes non se perda e poida ter un aproveitamento sostible. Dese xeito, os usuarios deste recurso poderían contar para os seus proxectos e iniciativas enerxéticas, un recurso renovable sen ningún tipo de problema de subministración.
O proxecto Silvaplus foi aprobado no pasado ano 2011 polo Comité de Xestión do Programa Operativo de Cooperación Transfronteiriza España-Portugal 2007-2013 da Unión Europea e ten unha duración de dous anos e conta, para o seu desenvolvemento, cun orzamento próximo aos 800.000 euros dos que 565.000 euros son achegados polo Fondo Europeo de Desenvolvemento Rexional (FEDER).

Publicado o 12 Mai 2012 en Condado, Medio Ambiente, Ponteareas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies