• Segue conectado
  • |

O alumnado estuda o percorrido do seu futuro camiño escolar

Acompañados dos técnicos e do profesorado o alumnado do CEIP Mestre Ramiro Sabell analiza o traxecto

Ponteareas | Acompañados dos técnicos da coooperativa de arquitectos e arquitectas, da Policía Local, protección civil e da concelleira de Ensino, ademais de outros membros do goberno en funcións, o alumnado do CEIP Mestre Ramiro Sabell saíu hoxe de andaina para estudar sobre o terreo o percorrido do camiño escolar seguro polo que ir á escola a pé ou en bicicleta gozando do contorna en compaña ou en solitario.

O punto de saída fixado foi o parque forestal Ferro-Ucha, dende o que camiñaron ao seu centro de ensino para comprobar in situ os perigos e as melloras que deben realizarse para que este traxecto sexa unha ferramenta máis para fomentar a autonomía persoal do alumnado.

Esta iniciativa promovida pola concellería de Ensino e apoiada pola Deputación de Pontevedra centra a súa atención nas necesidades de desprazamento sostible do alumnado ao seu centro escolar.

En liña coas premisas marcadas na estratexia europea “Ponteareas, Hábitat Saudable”, este novidoso proxecto fomenta a práctica da mobilidade a pé ou en bici en traxectos seguros e cotiáns e prioriza o dereito dos e das escolares a moverse con liberdade.

Cristina Fernández explica que o camiño escolar supón un cambio no concepto da nosa vila e na relación da infancia co entorno e vai dende o Colexio ata o parque forestal Ferro-Ucha aínda que no seu deseño contemplaránse todas as posibles rutas que precisa o alumnado.

“A intención é que os e as escolares, a partir dunha idade, acudan á escola en medios activos (andando ou en bicicleta), sós ou en compaña de amizades, veciñanza ou familiares”.

Este proxecto baséase nunha metodoloxía de traballo participativa na que nenas e nenos, nais e pais, profesorado, veciñanza, asociacións, Policía Local, Protección Civil, Concello e Deputación traballan de xeito conxunto para que a cooperativa de arquitectos vaia materializando o deseño dun camiño que pode cubrir incluso as necesidades de máis alumnado como os dos institutos. Co alumnado traballouse os venres ata maio e cada 15 días cos representantes das nais e pais, Policía Local, Protección Civil, voluntariado e técnicas do concello.

“Os camiños escolares axudan a construir unha contorna amigable, melloran a cohesión social, a seguridade viaria, reducen o tráfico tanto no traxecto como nos accesos aos centros e a contaminación, melloran o medio e fomentan hábitos de vida saudables, ademais de ser máis divertidos e atractivos para a mocidade e a infancia”.
Fernádez Davila felicita e agradece a toda a comunidade educativa a boa acollida do proxecto e á Deputación o seu apoio ao valorar positivamente esta proposta na que conseguiron reflectir a necesidade de permitir á infancia e mocidade desprazarse sacándolle partido a cada recuncho e facendo seus traxectos deseñados por e para eles.

Publicado o 29 Mai 2019 en Ponteareas, Portada, Seguridade Cidadá.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies