• Segue conectado
  • |

Música, andaina, obradoiros para os pequenos e II Feira Agrosostible o día 17 de maio en Mondariz

feira Agrosostible

Mondariz | O día 17 de maio, coincidindo coa festividade das Letras Galegas, Mondariz vén de organizar un amplo programa de actividades que inclúen a celebración da II Feira Agrosostible, evento que hoxe foi presentado na Casa do Concello coa presenza do alcalde de Mondariz, Xoán Carlos Montes Bugarín; a tenente de alcalde, Mónica Peralba e Carlos Rodríguez, de Ekohuerta, organizador da feira.

As actividades comezarán ás 11 da mañá coa apertura do mercado artesanal que contará con máis de 40 postos nos que, veciñanza e visitantes, poderán atopar produtos de alimentación e horta sostible, cosmética natural, terapias e plantas, amais de todo tipo artesanía tradicional. O mercado estará aberto, de xeito ininterrompido ata as 22 horas.

A esa mesma hora, e organizado por Mondariz Asociación Deportiva, terá lugar a saída da Andaina Saudable dende o recinto da feira. A actividade, totalmente gratuíta e con guía, levará aos participantes por sendas verdes, fontes e monumentos destacados da zona, ao longo dun percorrido de 6 quilómetros, cunha duración aproximada dunha hora e media.

Cara ás 12 h e ata as 14 horas, os máis pequenos poderán gozar das actividades dun Taller de Horta, dirixido á rapazada con idades entre os 5 e os 12 anos e que se desenvolverá en varios grupos (dependendo do número de nenos e nenas interesados) xa que para un mellor aproveitamento, os grupos serán de 8 compoñentes. Para esta actividade, é preciso anotarse de xeito gratuíto, cun Whatsapp ao 655 146 505.

Xa pola tarde, entre as 17 horas e as 20 horas, terá lugar outro obradoiro tamén dirixido a nenos e nenas a partir dos tres anos, que está incluído na actividade Peque Chef. Trátase dun divertido obradoiro para aprender a elaborar pizzas artesás e saudables. Ao igual que o obradoiro da mañá, as actividades desenvolveranse en grupos de 8 nenos/as e a inscrición realizarase no mesmo número de teléfono.

Os adultos tamén terán o seu espazo nesta II Feira Agrosostible, xa que de 18 h a 19:30 h poderán participar nun obradoiro de elaboración de xabón artesán.

Xa a partir das 19:30 horas, a música será a protagonista coa actuación da Banda de Música Cultural de Mondariz e o grupo Pé de Pote, unha actividade que, como todos os anos, está organizada pola Banda de Música Cultural de Mondariz.

O alcalde de Mondariz, Xoán Carlos Montes Bugarín, agradecía a Carlos Rodríguez, organizador da Feira Agrosostible, “o desenvolvemento dun mercado que, na súa primeira edición, contou cunha máis que sobresaínte participación de veciños e veciñas”. O rexedor municipal, no acto de presentación das actividades, tiña tamén palabras de agradecemento para Mondariz Asociación Deportiva, organizadores da Andaina e para a Banda de Música Cultural de Mondariz, “que sempre amosaron a súa disposición a colaborar en calquera actividade que poida supoñer un beneficio para a veciñanza e o municipio”.

Publicado o 16 Mai 2017 en Mondariz.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies