• Segue conectado
  • |

Gonzalo Caballero censura que Feijóo “poña a xunta a disposición de Casado e de VOX” nun “xogo de deslealdade” contra o Goberno

O líder dos socialistas galegos tacha de "impropia e irresponsable" a declaración aprobada pola Xunta: "Feijóo está dando un paso adiante camiño a ningures"

Santiago de Compostela/PSdeG| O secretario xeral do PSdeG, Gonzalo Caballero, compareceu hoxe acompañado da cúpula do seu partido para censurar a declaración institucional aprobada onte pola Xunta na que, “nun xogo de deslealdade”, Feijóo “puxo os intereses do PP por riba dos intereses de Galicia”.

“Esa declaración non representa á maioría de galegos e galegas”, advertiu Gonzalo Caballero, quen censurou que Feijóo puxo a Xunta “a disposición de Casado, de Vox e da ultradereita” e deixou claro que os socialistas galegos rexeitan que “as institucións públicas sexan utilizadas ao servizo do PP”.

Así, tras sinalar que Feijóo optou por seguir “a estratexia de confrontación e conflito” que está levando a cabo o seu xefe de filas en España, o secretario xeral do PSdeG considerou que a actitude amosada polo presidente é “irresponsable, impropia e desleal” coa Constitución e co Estatuto de Autonomía de Galicia.

E é que, como explicou o líder dos socialistas galegos, o goberno pode explorar politicamente as vías que considere para resolver unha situación “complexa e profunda”, máxime cando se trata dun goberno que está sostido por un partido “constitucional e constitucionalista”.

“A dereita en España está xogando coa realidade co único obxectivo de gañar aos electores que se lle están indo a Vox”, evidenciou Gonzalo Caballero, quen recordou que o PSOE, na oposición, respaldou a aplicación do artigo 155 da Carta Magna “por lealdade e por responsabilidade” cando a situación o aconsellaba.

O PP “non perdoa” a moción de censura
Despois de criticar o “xogo perigoso entre a dereita e a ultradereita”, o máximo dirixente do PSdeG concluíu que o PP “non perdoa” ter sido retirado do goberno por Pedro Sánchez para poñer en marcha “un modelo de país máis inclusivo”.

E, sen obviar que o PSOE é “garante da Constitución” e avogando pola busca de solucións ao conflito territorial, Gonzalo Caballero avisou a Feijóo de que coa declaración institucional “está dando un paso adiante camiño a ningures”.

Asemade, fixo alusión á decisión de Feijóo de adiantar a súa viaxe institucional por Estados Unidos para acudir á manifestación de Madrid. “Sairá abrazado a Vox cando a cidadanía galega estará demandando en Santiago unha sanidade pública de calidade”, finalizou Gonzalo Caballero.

“Polémica desproporcionada”
Pola súa banda, o presidente e voceiro parlamentario do PSdeG, Xoaquín Fernández Leiceaga, criticou “a polémica moi desproporcionada” aberta pola dereita en torno ás vías formuladas polo goberno para abordar a crise catalá.

“As críticas non poden pasar determinados límites”, subliñou Leiceaga, posto que o que sae “debilitado” desa confrontación é o propio Estado. Así é que chamou á “responsabilidade”, non sen recordar que “o cumio do desafío independentista”, a declaración unilateral de independencia, chegou con Mariano Rajoy na Moncloa.

Ao fío diso, remarcou “o compromiso constitucional” do PSOE e tachou de “irresponsable” a Feijóo por “arrastrar á Xunta” cara a estratexia “da ultradereita dirixida por Vox” de “alentar a confrontación” entre persoas e territorios.

En presenza tamén dos vicesecretarios xerais Pablo Arangüena e Marta Freire, así como da vicevoceira parlamentaria Patricia Vilán, Leiceaga advertiu de que os socialistas galegos “seguiremos dando a batalla para que Galicia teña unha voz que entenda mellor o Estado das Autonomías”.

Reforma da lei do aborto
Finalmente, Gonzalo Caballero sinalou que Pablo Casado “perdeu o norte político” coas súas manifestacións sobre a volta á lei do aborto do ano 1983. “Un regreso ao pasado”, dixo, que constitúe “unha irresponsabilidade absoluta” e que “só se pode entender polo medo a Vox”.

Non obstante, vaticinou que “esta falla de respecto ás mulleres” e “estes discursos propios doutro tempo” o que implicarán será “unha maior caída electoral” do PP. “Como cando hai 15 anos saían á rúa contra o matrimonio entre persoas do mesmo sexo da man de Rouco Varela e iso non os levou ao goberno”, recordou.

Publicado o 9 Feb 2019 en Política, Portada, Santiago de Compostela.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies