• Segue conectado
  • |

Gonzalo Caballero alerta dun “tripartito que poría en risco o Estado do Benestar”

O secretario xeral recalca que o debate permitiu ver a un presidente “no que se pode confiar” e que é a referencia “da esquerda e o progresismo con proxecto de país”

Ferrol/PSdeG | O secretario xeral do PSdeG, Gonzalo Caballero, demandou hoxe “un esforzo de mobilización masiva” dende hoxe ata o domingo para evitar “un susto, unha sorpresa” como a que tivo lugar en Andalucía e que haxa “un tripartito da dereita e a ultradereita que poría en risco o estado do benestar”.

“Que ninguén se despiste de aquí ao domingo”, recalcou o líder socialista, quen hoxe visitou Ferrol en compañía da ministra de Defensa, Margarita Robles, xunto co candidato á alcaldía, Ángel Mato, e a secretaria local, Beatriz Sestayo.

Neste escenario, Gonzalo Caballero reivindicou que “este goberno cumpre con Galicia”, como amosa o compromiso para a construción no asteleiro ferrolá de cinco fragatas para a Armada, que traerá como resultado a creación de 7.000 postos de traballo a través dunha inversión de máis de 4.300 millóns de euros.

A ministra de Defensa anuncia a firma da construción das cinco fragatas de Navantia, que suporán 7.000 empregos en Ferrolterra, tralos “retrasos” do goberno do PP

Así é que o máximo dirixente do socialismo galego apelou a dar ao PSOE de Pedro Sánchez “unha maioría ampla e sólida” que permita “gobernar con autonomía, sen dependencias” e seguir tendo “a prioridade social como principal compromiso co país e coa cidadanía”.

“Porque a Galicia vaille ben cando goberna o PSOE”, recalcou Gonzalo Caballero, en referencia a un executivo que en 10 meses “subiu as pensións, o salario mínimo interprofesional e o soldo dos empregados públicos” e que puxo en marcha plans de creación de emprego e de retorno dos nosos emigrados, entre outras medidas.

“REGRESO Á ETAPA DE AZNAR”

Ademais, como sinalou o secretario xeral, Pedro Sánchez amosou onte no debate televisado que é un presidente “no que se pode confiar” e que é a referencia “da esquerda e o progresismo con proxecto de país”.

No lado oposto, evidenciou, hai “unha ameaza para o noso modelo de sociedade”, pois “os pactos entre Casado, Rivera e Abascal son un regreso aos peores anos da democracia, á etapa de Aznar”.

“Ese tripartito supón retroceso, e caos, polos conflitos entre eles para ver quen supón máis retroceso”, concluíu Gonzalo Caballero.

“INVERSIÓN HISTÓRICA”

Finalmente, o líder do PSdeG puxo en valor a “inversión histórica” do Ministerio de Defensa no asteleiro ferrolán de Navantia, con 4.300 millóns de euros que permitirán a creación de 7.000 empregos na comarca.

“O PP deixara as fragatas nun caixón e Feijóo calaba”, reprobou, ao tempo que Margarita Robles anunciou que o contrato anunciado subscribirase hoxe mesmo. “Fronte aos retrasos do anterior goberno, nós cumprimos”, reivindicou.

Nesta liña de destacar “o valor da palabra dada” por ela mesma nunha visita anterior a Ferrol, resaltou que fixo “todo o posible” por “axilizar” os trámites dunha cuestión de moita relevancia para o sector naval galego. “E xa é unha realidade”, apostilou.

Antes, Margarita Robles tivo palabras de apoio e agarimo para os familiares e amigos dos dous mozos galegos que perderon a vida en Sri Lanka a causa dun ataque terrorista, contra o que amosou toda a súa repulsa.

Saúdos, Comunicación PSdeG-PSOE

Publicado o 24 Abr 2019 en Ferrol, Política, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies