• Segue conectado
  • |

“O valor de Podemos non está nos seus cargos nin nas súas persoas liberadas”

Carmen Santos | S. X. de Podemos Galicia

Carmen Santos (Porto do Son, 1981), chegou á secretaría xeral de Podemos Galicia logo dun proceso de eleccións internas, que para moitos contrarios á formación lila, era un enfrontamento entre faccións e a fractura anunciada de Podemos en todo o Estado. Non obstante, Podemos Galicia está aí, correntes seguen dentro da formación e de cando en vez, na prensa salta algunha posíbel ameaza de ruptura. Falamos con Carmen Santos sobre estes temas e outros relacionados co día a día en Galicia.

-Cal é a súa diante da denuncia presentada polo secretario xeral de Podemos Arzúa, quen ten un expediente aberto na formación.
-Realmente non temos nada que dicir. Todo está en mans da xustiza e non temos ningunha valoración engadida que facer. Internamente temos claro o que hai que facer, pero deixemos que a xustiza faga o seu traballo.

-A día de hoxe séntese respaldada por toda a organización en Galicia?
-Organizacións como Podemos Galicia, ten uns procesos de elección democrática e aberta á cidadanía, e con eses mecanismos establécense as persoas que deberan ter o liderado orgánico, político e de representación do noso proxecto. Os inscritos foron claros cando ditaminaron a súa posición en posteriores procesos, aínda que non foron unhas votacións directas á miña persoa, sabía da súa alta participación apoiando as posicións que eu defendía publicamente, tamén manifestaron en que liña estaban. O valor en Podemos non está nos seus cargos, nin nas persoas liberadas ou contratadas, que é algo que se falou en Vista Alegre, o respaldo están pois no que se votou nas diferentes consultas.

“Se hai alguén que non está dacordo co que votan as persoas inscritas, ten toda a liberdade para deixaren Podemos”

-Que tería que dicir aos apuntamentos sobre ruptura en Podemos, tanto nun nivel autonómico como estatal?
-O importante é, como dicía Pablo Echenique, ninguén ten a obriga de estar en Podemos. Cando se vota unha serie de temas, como unha determinada estrutura ou delegando competencias, pois diante diso hai que ser demócrata e aí defenderemos a transparencia. Por tanto, se hai alguén que non está dacordo co que votan as persoas inscritas, ten toda a liberdade para deixaren Podemos. O espírito da nosa organización, tanto cando se iniciou como despois nas asembleas cidadás, non hai nada por riba das asembleas de inscritos e inscritas. Voces críticas, baixo a miña percepción, minoritarias, pero que están na organización e que teñen dereito a discrepar, non están por riba da asamblea de inscritos e inscritas, por tanto terán que tomar a decisión pertinente se queren seguir sumando para facer un cambio político neste país a través desta ferramenta ou queren seguir outro camiño. Pero a maioría da organización ten claro que é a maioría lexítima e a unión fainos máis fortes para poder cambiar o país.

“En Galicia a unidade popular ou de forzas, demostra que en Galicia hai un espazo de cambio social que medra”

-Vivimos na terceira maioría absoluta do PP en Galicia con Alberto Núñez Feixóo. O PP é inamobíbel?
-En absoluto. Independentemente de que isto é proceso histórico e que para moitas de nós queriamos un cambio político desde moito antes, ese cambio para nós é imparábel. Comezou nas cidades, comezou coa irrupción de Podemos en 2014 nas eleccións europeas, logo coas municipais, demostra que hai un clima de cambio neste país. En Galicia a unidade popular ou de forzas, demostra que en Galicia hai un espazo de cambio social que medra. Houbo ciclos de menor e maior intensidade, pero ese xerme resiste fronte as estruturas caciquís do PP, que é a súa forza ademais do medo mediático que exerce co control férreo dos medios de comunicación e por cuestións relativas a unha sociedade máis envellecida que lles custa máis aceptar os cambios.

-Pero dentro do cambio xeracional hai moita xente nova que vota ao PP. Non é preocupante.
-Isto depende da nosa capacidade de traballo para vencer as redes clientelares e toda a manipulación informativa que existe. Tamén é evidente unha desafección política, hai moita xente que practica a abstención, Podemos mobilizou un eleitorado que non votara nunca e que segue sendo fiel a iso. Cando falamos de cambio xeracional é polos datos que saen no CIS, sabemos quen é a maioría de voto que aglutina Podemos, Unidos Podemos ou En Marea, non é cuestión que inventemos nós. Tamén hai xente maior que nos vota e sendo conscientes do que votan.

“Non é xustificábel o uso de medios públicos para favorecer a ningún governo”

-Xa que falou antes de medios, no caso de que Podemos dentro de En Marea, chegasen ao goberno da Xunta, retirarían as axudas públicas aos medios de comunicación?
-Podo falar como secretaria xeral de Podemos, non é xustificábel o uso de medios públicos para favorecer a ningún governo. Se van dar axudas públicas, que é algo lexítimo e que nós cumpriríamos no caso de dárense os requisitos sociais e de liberdade e pluralidade, con todas as cuestións que defendemos e se se participa en concorrencia de igualdade, non nos oporemos a iso e veríase cando se articulasen os orzamentos. Pero nós estamos en contra do uso partidista de cartos públicos para perpetuar a partidos políticos no poder enganando e terxiversando a información. Ese é realmente o punto importante, non digamos xa as canles públicas.

-Seguimos coa hipótese de entraren nun governo da Xunta, reformarían o estatuto ou pedirían as competencias que faltan?
-Teriamos que facer un debate amplo. Non podemos pregarnos, sabemos que temos que tender á federalización, e os nosos compañeiros a nivel estatal tamén o teñen moi claro. Hai unha realidade histórica no noso estado e en Galicia. Para cubrir as necesidades de galegos e galegas de maneira xusta, necesitamos maior teito competencial. Pero realmente o problema é o modelo territorial do 78, obsoleto e que debe ser reformulado. O modelo está esgotado e hai que crear un proceso constituinte para reformar o modelo territorial, recoñecendo as diferentes sensibilidades que existen no estado e das nacións que existen dentro do estado pero dentro dun marco que respete a unidade do estado. Queremos un recoñecemento desde a unidade e o respeto e a soberanía dos pobos a decidir que queremos formar parte deste estado.

-Menos de dous anos para as municipais. Cal é o traballo que está desenvolvendo Podemos Galicia de cara a esas eleccións?
-Estamos traballando con todas as formacións amigas e aliadas para formar candidaturas de unidade, como dixemos despois de Vista Alegre, que era a aposta de Podemos Galicia nas autonómicas, o modelo de Podemos Galicia está en sintonía con Vista Alegre II, fomentamos espazos de unidade. Os espazos de unidade son os que onde teñamos persoas que comparten o noso modelo municipal con eles conformaremos candidaturas. Pero tamén temos claro que Podemos é unha forza autónoma que ten que marcar as súas liñas coas formacións e persoas coas que compartimos programas e puntos en común. Isto tamén nos serviu para ver que temos grandes compañeiros e compañeiras de viaxe cos que queremos seguir.

“O abandono da Xunta de Galicia coa súa falta de diálogo e interacción coa xente do mar está pasando unha factura a un sector estratéxico e dos que máis riqueza crean no país”

-Vostede traballou no Instituto de Investigacións Mariñas dependente do CSIC. Cales serían os puntos que poría sobre a mesa para a mellora nas condicións laborais da pesca?
-A precarización laboral na pesca, o abandono da Xunta de Galicia coa súa falta de diálogo e interacción coa xente do mar. Está pasando unha factura a un sector estratéxico e dos que máis riqueza crean no país. Ademais, a eliminación das burocracias que moitas veces lles impide exercer a súa actividade. Tamén o exceso de controis por parte da Xunta, isto non so palabras miñas, senón de persoas do sector, que se senten perseguidos politicamente, mesmo cando levan adiante o seu traballo. Porque se levo algo que non debo ,últanme e ao mellor a sanción me arruina. Reparto máis xusto das cotas. Non as restrinxiría nin eliminaría pero si reparto máis xusto. Éunha compentecia estatal pero a Xunta debera presionar, que o secretario xeral de Pesca lle dá a razón a organizacións de pescadores e armadores, algunha mesmo gañou nos tribunais un pleito á Xunta sobre reparto das cotas. Falta de investimento político en investigación mariña. Podería seguir con moitos máis temas.

-Non considera o aumento dos orzamentos para políticas sociais como síntoma dun sistema que non resolve determinadas situacións das persoas?
-Estamos falando do modelo precarizador do PP ten unhas consecuencias tan graves e profundas, que eles mesmos tentan agochar ou disfrazar, dar unha caste de esmola para dicir que se están preocupando da xente. É unha cuestión de modelo. As axudas son necesarias, pero este debera ser un estado social e de dereito que se debera repartir equitativamente e procurar que todas as persoas teñan traballo. Tamén buscar un modelo que non divida a sociedade entre cidadáns de primeira e de segunda. Pero que vexamos un goberno que ten que aumentar os orzamentos para axudas sociais debido a uns índices de exclusión gravísimos, é unha noticia nefasta e que non representa a realidade que vive moita xente.


Nado en Xove. Redactor en medios online, gabinetes de prensa, campañas electorais e bolseiro en medios radiofónicos. Desenvolvemento de proxectos web municipais e posicionador SEO. Blogueiro, community manager e investigador.

Publicado o 5 Out 2017 en Entrevistas.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario. Si continúa navegando está a dar seu consentimento para a aceptación das mencionadas cookies e a aceptación da nosa política de cookies. Faga click no enlace para maior información. ACEPTAR

Aviso de cookies