• Segue conectado
  • |

A denuncia contra o franquismo chega ao Parlamento europeo

O BNG, da man de Ana Miranda –portavoz nacionalista en Europa- demanda a ilegalización da Fundación Franco por apoloxía do fascismo

Bruxelas | No convencemento de que a existencia da Fundación Francisco Franco é unha absoluta anomalía democrática, o BNG trasladou á eurodeputada Tatjana Zdanoka a petición para que se proceda a ilegalización desta entidade, que tramita as visitas ao pazo de Meirás. A eurodeputada letona (que visitou a ría do Burgo en 2013 e realizou un informe deixando constancia do seu mal estado) forma parte da Comisión de Peticións do Parlamento europeo que tramitará a solicitude realizada polo BNG en representación do Grupo Verdes-ALE.
Na presentación da petición en Bruxelas participaron a concelleira do Bloque no Concello de Sada, Isabel Reimúndez, o exalcalde desta localidade pola formación nacionalista, Abel López Soto, así como os investigadores Carlos Babío(e integrante da Asociación de Recuperación da Memoria Histórica de A Coruña) e Manuel Pérez Lourenzo, entre outros. Precisamente Babío e Lourenzo presentaron recentemente a obra “Meirás, un Pazo, un caudillo, un expolio”,no que explican como na Transición se deron os pasos necesarios para que o pazo de Meirás seguira pertencendo á familia Franco.

O argumento no que se basea o BNG para levar adiante esta iniciativa radica en que os valores que defende a Fundación -de enxalzamento da ditadura, como ela mesma recoñece-, son contrarios aos principios de democracia e dereitos fundamentais sobre os que se asenta a Unión Europea. Previsiblemente, a decisión da Comisión de Peticións sobre esta demanda demorarase tres meses, de forma que coincidirá co inicio do escano europeo por parte de Ana Miranda, en virtude dos acordos que o BNG mantén con outras formacións políticas.

Xornada#FranquismoPostFranco
Previamente á petición de ilegalización da Fundación Francisco Franco, o Bloque organizou no Parlamento europeo (en colaboración con ERC, Bildu e Compromís) a xornada “Franquismo despois de Franco”, na que diversos investigadores, políticos e xornalistas abordaron, desde diferentes perspectivas, a pervivencia e as consecuencias do franquismo.

A xornada artellouse en catro grandes bloques temáticos, de xeito que no primeiro deles falouse da pervivencia do franquismo nas institucións así como dos ataques á liberdade de expresión. O catedrático de Ciencias Políticas, Ramón Cotarelo; o director da revista El Jueves, GuillermoMartínez-Vela; a vicepresidenta da Deputación de A Coruña, GorettiSanmartín; e o profesor de Historia da USC, Lourenzo Fernández Prieto foron os encargados de poñer de manifesto esa pervivencia, citando como exemplos o pazo de Meirás e os ataques á revista El Jueves.
Xa no segundo bloque, baixo o título de “Políticas europeas de memoria: accións de recuperación da memoria histórica”, a eurodeputada italiana Bárbara Spinelli falou das similitudes e diferenzas entre o caso español e o italiano, mentres que MartíGrau explicou as actuacións para promover o franquismo en clave europea. Ademais, o xurista FerránPuchades fixo referencia á lei de memoria histórica da Comunidade Valenciana; JosepHuguet, da Fundación Josep Iria,explicou a recuperación do patrimonio catalán da República; e, finalmente, o profesor de Historia da USC Antonio Míguez falou do proxecto de recuperación da memoria nomesevoces.net.

Dando continuidade a este bloque, o terceiro centrouse no impacto do franquismo nas identidades nacionais do estado español. Así, o presidente da Fundación Euskal Memoria Fundazioa explicou as secuelas do franquismo en EuskalHerria; o historiador JoepMariaSolé fixo referencia a súa incidencia en Catalunya; o profesor de Socioloxía e Antropoloxía Social da Universitat de Valencia Vicent Flor, centrouse na relación entre franquismo e anticatalanismo no País Valencià; e o profesor de Historia e presidente da Fundación Alexandre Bóveda, Uxío-Breogán Diéguez,salientou o longo adoutrinamento que fixo posible a pervivencia do franquismo na sociedade española.

Finalmente, e nun cuarto bloque temático cargado de emoción, abordouse o tema “Dereitos humanos e memoria democrática”. O integrante da Plataforma Goldatu, -que loita polos dereitos dos represaliados vascos durante a ditadura- JosuIbargutxi, falou da impunidade do franquismo, tema que continuou o vicepresidente da Asociación pola Recuperación da Memoria Histórica, Marco González, coa súa ponencia “Agujereando la impunidad, Desde Priaranza del Bierzo a Buenos Aires.

Pola súa banda, a documentalista e unha das principais impulsoras da denominada “Querela arxentina”, Manuela Bergerot, abordou a cuestión da memoria histórica desde unha perspectiva de xénero e lembrou a inesquecible figura de Carlos Slepoy. A profesora de Dereito Penal da UDC fixo unha análise do negacionismo en Europa, mentres que o xornalista especialista en Memoria Histórica, Juan Miguel Baquero, abordou o drama das fosas do franquismo e o “terror silenciado”. Finalmente, o integrante da Iniciativa Galega pola Memoria, Matías Rodríguez explicou a recuperación da memoria en Galiza.

Publicado o 2 Dec 2017 en Aldea Global.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies