• Segue conectado
  • |

O artista lucense José María Lugilde expón en Madrid a mostra “Konfiguracions Kármicas Lugildianas” ata o primero de febreiro

A delegación da Xunta acolle unha selección de cadros e esculturas da súa última etapa caracterizada polo “Kousismo”

A Peneira dixital - Lugilde ante dous dos seus cadros

Madrid | A Casa de Galicia, sede institucional da Xunta en Madrid acolleu hoxe a inauguración da mostra de pintura e escultura do artista lucense José María Lugilde, co enigmático título, “KONFIGURACIONS KÁRMICAS LUGILDIANAS”. Lugilde ofrece unha selección da súa obra na que incorpora o “Kousismo”, que ven de cousas, en galego

A presentación do acto correu a cargo do coordinador de Actividades Culturais da Casa, Ramón Jiménez Pérez e nela tamén o autor explicou algúns “konceptos” da súa obra.

Jiménez comentou que “José María Lugilde é lucense da colleita do 44, e no 68 emigrou a Brasil, onde continuou os estudos de debuxo e pintura que iniciara na Fundación Bolaño Rivadeneira de Lugo, ampliados aos de gravado, escultura e deseño industrial, e a mediados ou finais dos setenta retornou a Galicia, imaxinamos que moi enriquecido de coñecementos e experiencias”. Xa en 2003 expuxo na Casa, unha mostra que titulou “VISIÓNSS”, con dobre S porque a Lugilde “lle gusta xogar coas palabras tanto como cos materiais cos que realiza as súas obras”, mantendo “a mesma liña surrealista”.

Despois de dez anos, José María “segue sendo o mesmo iconoclasta de sempre, provocador, irónico, surrealista e xenial.” Para Jiménez, “José María segue sendo un neno grande que non cella no seu empeño de querer cambiar o mundo mediante a práctica da filosofía do Kousismo, tamén conK, que basicamente consiste “na integración de cousas na obra, de tal maneira que non dane o motivo por saturación, senón que axude e complemente a mensaxe que pretende difundir e expresar”, segundo palabras de Adolfo de Abel Villela no prólogo ao catálogo elaborado para a ocasión.

As obras de Lugilde teñen mensaxes coas que expresan unha crítica social para deixar patente a súa desconformidade con algúns aspectos do mundo actual como o maltrato que sofre a natureza e que el simboliza coa escultura de “O kabreo de Gaia” ou o afán de mandar en “A erótika do poder”.

O artista, tras os agradecementos, explicou o persoal concepto de “Kousismo”, unha variante plástica na que estuda detidamente cada pequena cousa que unirá á obra ata que forme parte dela. Ese obxecto nunca aparece coa súa forma orixinal xa que é transformado para axustalo ao lugar exacto “para o que foi cavilado”. Unha vez aclarado este punto, tamén se referiu ao “intrínseco”. “Doulle á miña obra o valor en toda o seu espiritual nudez e para iso baséome nun pensamento aberto, crítico e evolutivo quizais movido por inquietudes cheas de sensibilidades filosóficas sociais, con beliscos de ironía que me levan a cuestionar case todo,” dixo.

A mostra de Lugilde, que poderá verse ata o primeiro de febreiro, compóñena un total de 22 obras. Delas, 18 son cadros, a maioría surrealistas, e catro esculturas. A cor, os estudados trazos e o “kousismo” son a nota en común, o seu selo propio e intrasferible.

Publicado o 9 Xan 2013 en Aldea Global, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies