• Segue conectado
  • |

Morgana en Esmelle. Begoña Caamaño (Galaxia, 2012).

Dentro da nosa tradición literaria, tan dada a darlle periodicamente algunha volta á materia de Bretaña, botábase en falla unha obra coma esta. Morgana en Esmelle sería o último texto que dou esta sorte de código arturiano no que ciframos a realidade cando precisamos a distancia do mito. E xa ían sendo horas dunha revisión en clave feminista. Begoña Caamaño recorre ao Merlín máis galego, o de Cunqueiro, para enmarcar unha explicación oculta da derrota de Artur e, por extensión, da súa patria. En terra de Miranda Merlín recibe a visita de Morgana, irmá do rei bretón, para axustar contas co pasado e dignificar o seu propio papel e o de Viviana, dúas das mulleres peor tratadas por algunhas versións da historia.

A vocación irreverente non remata aquí. A perspectiva feminina, subversiva de por si, permite que se multipliquen as lecturas que cuestionan o relato oficial sobre o “goberno” de Artur, as estratexias que permitiron que chegase ao poder e os motivos do seu fracaso, aspectos que, á súa vez, traducen a actualidade galega de xeito orixinal e nada axiomático. A loita entre os dous modus operandi que se plantexan na obra non fan máis que abrir interrogantes que aínda non fomos quen de pechar: como se deben xestionar as esencias da identidade? Como se prepara o futuro da nación? Onde están os límites da ética para os políticos, os xestores e os intelectuais da patria? É máis eficaz refuxiar o saber nunha sorte de Ávalon que mide os contactos co pobo á espera de tempos mellores, ou renunciar aos propios principios en busca dun achegamento populista aínda que manipulador? É beneficiosa a relación entre poder e relixión? E xa no plano máis íntimo, ata que punto son xustas as fronteiras nas que a sociedade pecha o amor? Ata que punto estamos feitos de remorsos e derrotas?

Porén, a solemnidade destas preguntas en ningún momento dificulta a lectura que discorre cómoda grazas a uns personaxes ben construídos, á diversidade de argumentos paralelos e á curiosidade que esperta coñecer a cara “B” dunha historia que nos é tan sabida.


Licenciada en Filoloxí­a Hispánica, (UDC, 1994-1998) e Filoloxí­a Galega (USC, 1998-2000), na actualidade, imparte aulas de Lingua e Literatura Galega no Ensino Secundario.
Publicado o 11 Out 2012 en Libros.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies