• Segue conectado
  • |

En Marea anima as mulleres de Ourense a que secunden a folga feminista do vindeiro 8 de marzo

Ánxeles Cuña destaca que hai motivos de sobra para mobilizarse, especialmente en Ourense, onde as mulleres teñen as pensións máis baixas do Estado e un emprego moi precarizado

Ourense/En Marea | En Marea chama á mobilización das mulleres o vindeiro 8 de marzo para revindicar a igualdade en tódolos ámbitos da vida, segundo explicou a deputada no Parlamento de Galicia Ánxeles Cuña, quen fai un chamamento a “parar nos traballos, nos coidados, no consumo e no ensino”. Dende un punto de vista laboral “hai unha fenda salarial inaceptable entre mulleres e homes, somos as que asumimos os traballos sen remunerar, os temporais e aínda que seguimos sendo máis da metade da humanidade, o acceso aos postos de decisión e administración son pírricos e irrelevantes”, sinalou a deputada. Se isto segue así, indicou Cuña, en Ourense aínda que hai 2.076 mulleres estudando na univesidade e 1.428 homes, só tres delas chegarían a postos de dirección e o resto serían para os homes. A isto hai que engadir que en todo o ano 2017 en Ourense “non se moveu o emprego feminino”.

Ánxeles Cuña convida tamén as coidadoras a parar o vindeiro 8 de marzo xa que “en Ourense hai preto de 24.000 mulleres dedicadas aos labores do fogar non remunerados, a coidar as persoas con incapacidades permanentes e este problema é o duplo no rural, onde as mulleres soportan o dobre de cargas”. Naqueles casos que non poidan deixar os seus traballos, a deputada sinala que poden colgar un mandil no balcón en sinal de apoio ás reivindicacións.

En Marea fai tamén un chamamento aos homes nesta mobilización: “pedímoslles que asuman todos estes labores e que contribúan á folga”, apuntou Ánxeles Cuña nunha comparecencia coa concelleira Ledicia Piñeiro na sede de Ourense en Común.

Ademais do apoio explícito a esta folga “legal e lexítima” e aos colectivos feministas que a promoven, En Marea tratará nun pleno monográfico tódalas cuestións relacionadas coas desigualdades que padecen as mulleres, no que tódalas preguntas, mocións e interpelacións serán arredor deste tema.

Publicado o 26 Feb 2018 en Ourense, Portada.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies