• Segue conectado
  • |

Compostela, escenario da primeira “Silent Wifi Music Experience” dentro das Xornadas de Música Contemporánea

Un concerto anovador, unha experiencia multisensorial suxestiva e íntima, unha viaxe cun piano silencioso... No silencio da noitiña, un piano de cola Yamaha equipado coa novidosa tecnoloxía Silent, audible a través de auriculares wifi, ofrece unha experiencia única para o público, que pode percorrer libremente nun radio de 500 metros inmerso nun microcosmos auditivo.

Compostela | A cita será mércores, ás 21:30 horas, na praza de Cervantes, e os auriculares poderán recollerse a partir das 20:30 h cubrindo un documento e deixando o DNI en depósito. O público pode moverse libremente mentres escoita o concerto. O programa escollido para esta experiencia musical recolle obras de autores contemporáneos, música popular trasladada ao piano e clásicos revisitados, incluíndo a visita a Galicia do Pergamiño Vindel coa música de Martín Códax. Os compositores galegos Octavio Vázquez e María Mendoza comparten programa co arxentino Ginastera, o finés Einojuhaani Rautavaara e o estonio Arvo Pärt.

Esta proposta está enmarcada dentro das Xornadas de Música Contemporánea que se están a celebrar en Compostela do 6 ao 29 de xuño, organizadas polo Concello de Santiago, a USC, A Deputación da Coruña, o CGAC e o Consorcio de Santiago. Baixo o título “Música, Emoción e Memoria” a proposta deste ano celebra a pegada e a obra de Enrique Xerardo Macías (1958 – 1995), compositor vigués que abriu a música galega a outras sonoridades e formou parte dos fundadores deste certame en 1987. Nesta edición decidiuse trasladar o mes de celebración das xornadas á temporada estival para repartir a programación ao longo do ano e tamén para poder celebrar concertos ao aire libre como este que hoxe presentamos. A actividade é de balde cun límite de 300 auriculares.

Javier Otero, piano

“Javier Otero Neira mergúllese con éxito e admirable refinamento no universo do Impromptu, a través de páxinas de Chopin, Schubert e Fauré. Un valor a considerar”. Justo Romero – Revista Scherzo.

Javier Otero forma parte dunha nova xeración de pianistas novos españois con proxección nacional e internacional. Inicia os seus estudos musicais na súa vila natal (A Estrada – Pontevedra). Formado cos pianistas Nicasio Gradaille e Ángel González, trasládase ao Real Conservatorio Superior de Música de Madrid para cursar os seus estudos superiores coa catedrática Almudena Cano. Gañador de premios en concursos nacionais e internacionais, destaca o Primeiro Premio no Concurso Internacional de Piano Blüthner (Alemaña). Actuou en directo para Radio Clásica e participou en gravacións para a televisión de Croacia, TVE e TVG. Especialmente destacables foron as súas interpretacións na Fundación Juan March (Madrid), o Instituto Cervantes de Tokio e dentro do ciclo de pianistas Ángel Brage do Auditorio de Galicia, sendo o primeiro pianista español convidado; tamén foi o primeiro pianista galego en realizar unha xira coa Real Filharmonía de Galicia. Conta con dous traballos discográficos: Impromptus (2015) e Galician Folk Songs (2016), xurdido da creación dun concurso de composición de obras para piano só con temática galega. No seu achegamento a diferentes músicas, iniciou hai uns anos un proxecto co pianista de jazz Abe Rábade, “Dúas visións a dous pianos”. Ademais de intérprete, é o director artístico do Festival Piano Meeting, que celebrou a súa primeira edición no 2017 en Ourense.

Publicado o 18 Xuñ 2018 en Santiago de Compostela.
Síguenos no noso canal do TELEGRAM

Iniciar sesión

Uso de cookies

Este sitio web utiliza as cookies para que vostede teña unha mellor experiencia de usuario.
Si continúa navegando está a dar seu consentimento para a aceptación das mencionadas cookies e a aceptación da nosa política de cookies.
Faga click no enlace política de cookies para maior información. ACEPTAR

Aviso de cookies